Leona Health startapı həkimlər üçün WhatsApp problemini həll edir

    Technote.az “TechCrunch” platformasına istinadən bildirir ki, Uber Eats-in Latın Amerikası üzrə ilk baş meneceri və sonradan Rappi-nin COO-su olmuş Karolin Merin regionda səhiyyə texnologiyalarının nə qədər geri qaldığını yaxından görüb. Onun sözlərinə görə, Latın Amerikasında həkimlərin böyük əksəriyyəti xəstələrlə bütün ünsiyyəti WhatsApp üzərindən aparmağa məcburdur.

    Merin bildirir ki, pasiyentlər artıq yemək sifarişi tətbiqlərindəki sürəti həkimlərdən də gözləyirlər, lakin bu, tibbi personal üçün ciddi yüklənməyə səbəb olur. Gün ərzində 20 pasiyent qəbul edən bir həkim axşam evə çatanda 100-dən çox WhatsApp mesajı alır və tibbi məlumatlara baxmadan dərhal cavab verməsi gözlənilir. Bu problemi görən Merin iki il əvvəl Leona Health adlı startapı qurub. Leona həkimlərin WhatsApp hesabları ilə inteqrasiya olunan süni intellekt əsaslı “AI-köməkçi”dir. Pasiyentlər əvvəlki kimi WhatsApp-dan yazır, lakin həkimlər bütün mesajları Leona-nın mobil tətbiqi üzərindən idarə edir.

    Tətbiq mesajları prioritetə görə sıralayır, cavab təklifləri verir və həkimin komandasında olan digər şəxslərin (məsələn, tibb bacılarının) pasiyentlərə cavab verməsinə imkan yaradır. Şirkət yaxın zamanda görüşlərin planlaşdırılması və ilkin müraciətlərin avtomatik idarəsi üçün tam avtonom agent də istifadəyə verəcək. Leona Health çərşənbə axşamı Andreessen Horowitz (a16z) rəhbərliyi ilə 14 milyon dollarlıq seed investisiya cəlb etdiyini açıqlayıb. Raundda General Catalyst, Accel, həmçinin Maven Clinic, Nubank və Rappi rəhbərləri də iştirak edib.

    Hazırda Leona 14 Latın Amerikası ölkəsində 22 tibbi ixtisas üzrə həkimlərə xidmət göstərir. Merinin sözlərinə görə, platformadan istifadə edən həkimlər gündə orta hesabla 2–3 saat vaxt qazandıqlarını bildirirlər.

    Startapın komandası hazırda 13 nəfərdən ibarətdir və Meksiko şəhəri ilə Silikon Vadisi arasında fəaliyyət göstərir. Şirkətin uzunmüddətli planı WhatsApp üzərindən həkim–pasiyent ünsiyyətinin geniş yayıldığı digər regionlara da açılmaqdır.