LG Chem, hazırladığı istiliyə həssas Safety Reinforced Layer (SRL) adlanan qatın sayəsində batareyaların həddindən artıq qızdığı hallarda istilik sızmasını qarşısını ala biləcəyini bildirib. Açıqlamaya görə, bu material istilik artdıqca elektrik müqavimətini dəyişdirərək, həddindən artıq qızmanın ilkin mərhələlərində elektrik axınını kəsən bir "qoruyucu" kimi fəaliyyət göstərir. LG Chem-in açıqlamasına əsasən, SRL sadəcə 1 mikrometr qalınlığında, yəni insan tükünün qalınlığının yüzdə biri qədər nazik bir qatdır. Bu material, batareyanın katod təbəqəsi ilə elektron axını təmin edən alüminium folqa arasına yerləşdirilir. Batareyanın istiliyi 90°C-130°C arasında çatdıqda, material istiliyə reaksiya verərək molekulyar quruluşunu dəyişdirir və beləliklə elektrik axınını effektiv şəkildə kəsir.

     Materialın elektrik müqaviməti hər 1°C istilik artımında 5.000 ohm artır və maksimum müqavimət adi istiliklərdəki müqavimətin 1.000 qatına qədər yüksələ bilir. Ən diqqətçəkən xüsusiyyəti isə bu müqavimətin geri çevrilə bilməsidir, yəni istilik normal səviyyəyə düşdükdə müqavimət əvvəlki halına qayıdır və elektrik axını yenidən normal şəkildə davam edir. Verilən məlumata görə, LG Chem-in bu yeni texnologiyası POSTECH Universiteti ilə birlikdə sınaqdan keçirilib. Həmçinin batareyanın təhlükəsizlik sınaqları LG Chem-in enerji saxlama bölməsi olan LG Energy Solution ilə əməkdaşlıqda aparılıb. Sınaqların nəticəsində SRL ilə təchiz edilmiş batareyaların vurma və deşmə testlərində ya yanmadığı, ya da alovlandıqdan qısa müddət sonra söndüyü bmüşahidə edilib.

     Litium kobalt oksid (LCO) batareyalarında aparılan mismar deşilmə sınağında adi batareyaların sadəcə 16%-i yanmayıb. Buna qarşılıq isə yeni materiala sahib batareyalarda heç bir yanğın hadisəsi baş verməyib. Elektrikli avtomobillərdə istifadə edilən nikel-kobalt-manqan (NCM) batareyaları üzərində aparılan vurma testlərində isə 10 kiloqramlıq yük, batareyaların üzərinə buraxılıb. Standart batareyaların hamısında yanğın baş verərkən, SRL ilə təchiz edilmiş batareyaların 70%-i heç yanmayıb, qalan 30%-i isə saniyələr içində öz-özünə sönüb. Məlumdur ki, elektrikli avtomobillərdə baş verən yanğınlar çox vaxt avtomobil tamamilə kül olana qədər söndürülə bilmir.

     Tədqiqatçılar bu yeni texnologiyanın batareyalardakı partlama riskini 63%-dən 10%-ə endirdiyini bildirirlər. Bundan əlavə, bu texnologiya əvvəlki metodlardan daha sürətli reaksiya verir və enerji sıxlığını azaltmır. LG Chem, bu yeni materialın tezliklə kütləvi istehsala tətbiq oluna biləcək bir araşdırma uğuru olduğunu vurğulayır. LG Chem, SRL-nin mobil batareyalar üzərindəki təhlükəsizlik testlərini tamamladığını və gələn il ərzində yüksək həcmli elektrikli avtomobil batareyaları üçün testlərə davam etməyi planlaşdırır.