Keçən həftə məlumat verilmişdi ki, Nintendo şirkəti öz yeni portativ oyun konsolunu Gamescom 2023 sərgisi çərçivəsində bağlı qapılar arxasında məhdud sayda insana sərgiləyib. İndi isə insayderlər şirkətin yeni portativ oyun konsolunun texniki göstəriciləri barəsində bəzi məlumatları təqdim ediblər. Verilmiş məlumata əsasən yeni oyun konsolu 12 GB RAM-a sahib olacaq. Müqayisə üçün qeyd etmək lazımdır ki, Playstation 5 və Xbox Series X konsolları 16 GB RAM ilə təchiz olunurlar.

    Üstəlik insayderlər bildiriblər ki, Gamescom 2023 sərgisi çərçivəsində yeni oyun konsolunda Epic Games şirkətinin “The Matrix Awakens” adlı texniki demosunun sərgilənməsi zamanı Nintendo NVIDIA-nın DLSS 3.5 deyil, DLSS 3.1 texnologiyasından istifadə edib. Üstəlik məlumatda qeyd edilib ki, Nintendo-nun yeni oyun konsolu ray tracing texnologiyasının dəstəyinə sahib olacaq. Daha öncəki məlumat sızıntılarına əsasən Nintendo Switch 2 (ad şərtidir) 8 düym ölçülü ekran və 512 GB daxili yaddaş həcmi ilə təchiz olunacaq. Təqdim edilmiş bu məlumatların doğru olub-olmadığı bilinmir. Lakin əgər onlar həqiqəti əks etdirirlərsə, deməli yaxın zamanda Steam Deck və ASUS ROG Ally konsollarının güclü rəqibi satışa çıxa bilər. Qeyd etmək lazımdır ki, Nintendo-nun öz yeni oyun konsolunu gələn il təqdim edəcəyi gözlənilir.