Polşa 4 günlük iş həftəsinin testinə hazırlaşır

     Polşa əməkhaqqı azaldılmadan iş saatlarının qısaldılması ilə bağlı pilot proqramın başladılmasına hazırlaşır. Ailə, Əmək və Sosial Siyasət Nazirliyi elan edib ki, bu gündən etibarən şirkətlər və dövlət müəssisələri könüllü şəkildə növbəti 3 yeni iş formatından birinə keçə biləcəklər: 6 saatlıq iş günü, həftədə 3 günlük istirahət və ya əlavə məzuniyyət günləri. Layihə il ərzində ümumi əmək müddətinin 20% azaldılmasını nəzərdə tutur və iş və şəxsi həyat balansını yaxşılaşdırmaqla yanaşı, demoqrafik böhranla mübarizəyə yönəlib. Təşkilatlar növbəti 3 seçimdən birini tətbiq edə biləcəklər: iş gününün 6 saata endirilməsi, həftədə 3 istirahət gününün tətbiqi və ya həftəlik iş yükünün azaldılması hesabına əlavə məzuniyyət günlərinin verilməsi.

     Əsas şərt - iş saatları azaldılsa belə, əməkhaqqının əvvəlki səviyyədə saxlanılmasıdır. Proqrama iştirakçıların cəlb olunması meyarları isə sonradan elan ediləcək. Pilot layihənin həyata keçirilməsi üçün Əmək Fondundan 10 milyon zlotı (təxminən 2 761 488 dollar) ayrılıb. Layihədə iştirak edən şirkətlər öz biznes proseslərini uyğunlaşdırmaq, iş qrafiklərini dəyişmək, rəqəmsal vaxt uçotu sistemlərini tətbiq etmək və mütəxəssis məsləhətləri almaq üçün 1 milyon zlotıya (təxminən 276 148$) qədər maliyyə dəstəyi əldə edə biləcəklər. Qısaldılmış iş həftəsini daha əvvəl sınaqdan keçirmiş Polşa təşkilatları müsbət nəticələr göstərirlər. Vlotslavek meriyasında və Herbapol Poznan şirkətində qısaldılmış iş qrafiki tətbiq edildikdən sonra işçi dövriyyəsi azalıb, xəstəlik səbəbilə işdən qalma halları minimuma enib və əmək məhsuldarlığı artıb.

     Polşa artıq bir neçə ildir uğurla tətbiq olunan qısaldılmış iş həftəsi modelinə keçmiş Fransa, Danimarka və Belçika kimi ölkələrin nümunəsini izləyir. Belə ki, Fransa 35 saatlıq iş modelinə keçdikdən sonra ölkənin ÜDM-i demək olar ki, 81% artıb. Polşa hakimiyyəti vurğulayır ki, iş saatlarının azaldılması şirkətlərin maliyyə nəticələrinə zərər vermir, əksinə, işçilərin motivasiyasını artırır. Bu təşəbbüs həmçinin demoqrafik böhranla mübarizə vasitəsi kimi də nəzərdən keçirilir. Gözlənilir ki, vətəndaşların daha çox boş vaxtı olması doğum səviyyəsinin artmasına və yaşlı işçilərin daha uzun müddət əmək bazarında qalmasına töhfə verəcək. Pilot proqramın 15-18 ay davam edəcəyi planlaşdırılır. Əgər sınaq mərhələsi uğurlu nəticə verərsə, bu layihə 2027-ci ilin sonunadək, yəni hazırkı parlament çağırışı dövründə qəbul olunması nəzərdə tutulan yeni əmək qanunvericiliyinin əsasına çevrilə bilər.