Rocket Lab öz peyk internet imperiyasını qurmağa başlayır

    ABŞ-nin özəl kosmik şirkəti Rocket Lab peyk rabitəsi operatoru Iridium Communications-ı 8 milyard dollarlıq razılaşma ilə satın aldığını açıqlayıb. Şirkətin əsas məqsədi SpaceX-in Starlink xidməti və Amazon-un Leo peyk internet layihəsinə qarşı rəqabət qabiliyyətini artırmaqdır.

    Müqavilə tənzimləyici qurumlar tərəfindən təsdiqlənərsə, Rocket Lab Iridium-un 80 peykdən ibarət qlobal şəbəkəsinə və şirkətin simsiz rabitə spektrinə sahib olacaq. Bu da Rocket Lab-a öz peyk internet və rabitə xidmətlərini daha sürətli genişləndirmək imkanı verəcək. Iridium xüsusilə dünyanın ən ucqar bölgələrində peyk əlaqəsi təmin etməsi ilə tanınır. Şirkət daha əvvəl Qualcomm ilə əməkdaşlıq edərək Android smartfonlarında peyk mesajlaşma xidmətini istifadəyə verməyə çalışmışdı. Lakin telefon istehsalçılarının maraq göstərməməsi səbəbindən bu layihə 2023-cü ildə dayandırılmışdı.

    Şirkət həmçinin vurğulayıb ki, Iridium-un mövcud şəbəkəsini inkişaf etdirərək yeni bazarlara daxil olmaq və yeni kosmik xidmətlər yaratmaq niyyətindədir. Son illərdə Starlink-in sürətli böyüməsi və SpaceX-in rekord bazar dəyəri digər kosmik şirkətləri də daha aqressiv addımlar atmağa məcbur edib. Rocket Lab-ın bu satınalması da peyk internet bazarında rəqabətin daha da güclənəcəyinin növbəti göstəricisi hesab olunur.