Xiaomi şirkəti Xiaomi 13T smartfon seriyası ilə birlikdə Xiaomi Watch 2 Pro flaqman smart saatını da təqdim edib. Bu, Xiaomi-nin Google əməliyyat sistemi və Qualcomm prosessoru vasitəsilə çalışan ilk smart saatıdır. Söhbət, WearOS əməliyyat sistemindən və Snapdragon W5+ Gen 1 prosessorundan gedir. Xiaomi Watch 2 Pro smart saatı 46 mm-lik gövdə ölçüsünə sahibdir. Saatın özü paslanmaz poladdan hazırlanmış gövdə ilə təchiz olunub. Üstəlik gövdə sudan qorunma özəlliyinə sahibdir və üst hissəsi fırlana biləndir. Xiaomi Watch 2 Pro 4G LTE dəstəyini əldə etdiyi üçün o, smartfondan asılı olmayaraq tam avtonom şəkildə çalışa bilir.

    WearOS sayəsində smart saat Google Maps, Google Pay və Youtube Music servislərini dəstəkləyir. Smart saat 150-dən çox idman rejimini dəstəkləyir. Üstəlik Xiaomi Watch 2 Pro ürək döyüntüləri ritmini, qandakı oksigen miqdarını, stress səviyyəsini və yuxu keyfiyyətini monitorinq edə bilir. Şirkət bildirib ki, 4G imkanlarından istifadə edilmədiyi halda smart saat 65 saat ərzində, 4G-nin aktivləşdirildiyi halda isə 55 saat ərzində çalışa bilir. Xiaomi Watch 2 Pro yaxın günlərdə satışa çıxacaq. Yalnız Wi-Fi və Bluetooth dəstəkli versiya 270 avroya, 4G dəstəkli versiya isə 330 avroya satılacaq.