Logo
    main-post-cover

    Yer kürəsinə bənzər planetlərin sayı düşünüldüyündən daha az ola bilər

         Yeni bir tədqiqat göstərib ki, alimlər TESS kosmik teleskopunun məlumatlarını düzgün şəkildə şərh etməyiblər. Məlum olub ki, ölçüsünə görə Yerə bənzər hesab edilən planetlər əslində daha böyükdür. Alimlər Günəş sistemindən kənarda planetlər axtaran TESS teleskopunun məlumatlarını yenidən təhlil ediblər. Nəticədə, daha əvvəl ölçüsünə görə Yerə bənzər sayılan təxminən 200 planetin əslində fərqli göründüyü ortaya çıxıb. Bu kəşf, Yer xaricində həyat axtarışına təsir göstərə bilər. Həmin planetlərin bəziləri böyük okean planetləri ola bilər. Lakin bu, orada həyatın yaranması üçün uyğun şəraitin mövcud olduğunu göstərmir. TESS kosmik teleskopu planetləri tranzit metodu ilə aşkar edir. Planet ulduzun qarşısından keçərkən, ulduzun parlaqlığı azalır və planet bir kölgə yaradır.
         Alimlər bildirirlər ki, bu zaman planetin yaratdığı kölgə ölçülür və bu yolla onun ölçüsü haqqında fikir əldə etmək mümkündür. Ulduzun planetdən əks olunan işığı sayəsində alimlər həmin dünyanın tərkibi barədə də nəticə çıxara bilirlər. Alimlər Yerə bənzər tərkibə və ölçüyə malik planetlərə dair məlumatları yenidən təhlil ediblər. Lakin məlum olub ki, qonşu ulduzlardan gələn işıq TESS teleskopunun məlumatlarını təhrif edə bilər və bu da planetin ölçüsünə dair nəticələrin yanlış olmasına səbəb ola bilər. Tədqiqat göstərib ki, əksər hallarda, ölçüsünə görə Yerə bənzər hesab edilən planetlər əslində Yer planetindən daha böyükdür. Astronomlar deyirlər ki, yeni məlumatlara əsasən, Yerə bənzər planetlər qalaktikamızda əvvəl düşünüləndən daha az yayılıb.
         Alimlər hesab edirlər ki, daha əvvəl Yerə bənzər kimi qiymətləndirilən dünyalar əslində Neptun Uran kimi qaz nəhəngləri və ya böyük okean planetləri - yəni qikeanlar ola bilər. Qikeanlar Yerlə oxşar tərkibə malikdirlər və su, məlum olduğu kimi, həyatın əsasını təşkil edir. Lakin bu cür qayalı planetləri tamamilə örtən okeanlarda həyatın yaranması üçün bütün şəraitin olub-olmadığı dəqiq bilinmir. Alimlər bildirirlər ki, bu yeni kəşf potensial yadplanetli həyat axtarışlarına təsir göstərə bilər, çünki yaşamağa yararlı planetlərin sayı əvvəllər düşünüləndən daha az ola bilər. Digər tərəfdən isə, alimlər hal-hazırda qikeanların nə dərəcədə geniş yayıldığı və həyat dəstəkləyə bilib-bilməyəcəyi məsələsini müzakirə edirlər. İndi alimlər əvvəllər ölçüsünə görə yaşamağa yararsız sayılmış planetləri yenidən tədqiq etməyi planlaşdırırlar. Ola bilsin ki, həmin planetlərin də əsl ölçüləri tamam fərqlidir.
    Paylaş