Apple Louisville-dəki mağazasını 1 milyon dollara yeniləyir

    Technote.az “Apple Insider” platformasına istinadən bildirir ki, Apple ABŞ-nin Louisville şəhərində yerləşən Apple mağazalarından biri yaxın vaxtlarda genişmiqyaslı yenidənqurma işlərinə hazırlanır. Məlumata görə, Oxmoor Center daxilində yerləşən “Apple Oxmoor” mağazasının yenilənməsi təxminən 1 milyon dollara başa gələcək.

    2019-cu ilin sentyabr ayında açılan mağaza xüsusilə geniş şüşə fasadı və açıq həyəti ilə seçilir. Lakin açılışından cəmi 6,5 il sonra Apple bu məkanı daha da modernləşdirmək qərarına gəlib. Louisville Metro Planning and Design qurumuna təqdim edilən icazə sənədinə əsasən, layihə çərçivəsində mağazanın həm daxili, həm də xarici hissələrində dəyişikliklər ediləcək. Əsas işlərdən biri açıq həyət hissəsində xarici örtüklərin (cladding) yenilənməsidir. Bundan əlavə, mağazanın 659 kvadrat fut (təxminən 61 kvadrat metr) sahəsində əlavə təkmilləşdirmələr planlaşdırılır.

    Tikinti işlərinin ilkin dəyəri 800 min dollar olaraq qiymətləndirilsə də, yekun məbləğin dəyişə biləcəyi qeyd olunur. Layihəni Sajo Construction şirkəti həyata keçirəcək. Bu şirkət son 20 il ərzində Apple-ın bir çox mağaza layihələrində iştirak edib. Hazırda yenidənqurma işlərinin nə vaxt başlayacağı və nə qədər davam edəcəyi ilə bağlı rəsmi açıqlama verilməyib. Nə Apple, nə də ticarət mərkəzinin sahibi olan General Growth Properties məsələ ilə bağlı şərh edib.