Avstraliyanın Queensland ştatında yerləşən bu laboratoriyada 2021-ci ildə baş verən, lakin yalnız 2023-cü ilin avqustunda aşkar edilən bu ciddi biotəhlükəsizlik insidenti ilə bağlı Queensland Səhiyyə Nazirliyi genişmiqyaslı araşdırma başlatdığını açıqlayıb. Yoxa çıxan nümunələr arasında müxtəlif klinik xüsusiyyətlərə malik viruslar olduğu bildirilir. Təxminən 100 flakonda insanlara atlardan keçən və 57% ölüm nisbətinə malik Hendra virusu olub. Bundan əlavə, quduzluğa bənzəyən və yüksək ölüm nisbətinə sahib olan 223 Lyssavirus və 2 Hantavirus nümunəsi də itkin düşüb.

     Hadisə laboratoriyada nümunələrin saxlanıldığı dondurucunun sıradan çıxması səbəbindən baş verib. Flakonlar yeni dondurucuya köçürülərkən düzgün qeydiyyat aparılmadığı bildirilir. Queensland-in Səhiyyə Naziri Tim Nicholls baş verənləri “ciddi biotəhlükəsizlik protokolu pozuntusu” kimi qiymətləndirib. Rəsmilər hadisədə qəsdən təxribat və ya bioloji silah istehsalı məqsədinin olmadığını düşünür. Daha çox flakonların köçürülmə zamanı itməsi ehtimalı nəzərdən keçirilir. Eyni zamanda mütəxəssislər laboratoriya şəraiti xaricində virus nümunələrinin tez bir zamanda pozulacağını və yoluxma qabiliyyətini itirəcəyini vurğulayırlar.

     İtkin virusların ictimai sağlamlıq üçün təhlükə yaratmadığı bildirilsə də, belə hadisələr araşdırma laboratoriyalarında biotəhlükəsizlik protokollarına ciddi şəkildə əməl etməyin vacibliyini bir daha göstərir. Queensland Səhiyyə Nazirliyi, işçilərinə əlavə təlimlər keçərək və təhlükəli maddələr üzrə sistemləri yenidən nəzərdən keçirərək biotəhlükəsizliyi artırmağa çalışır.