Kaliforniya və Nyu-York Paramount-Warner Bros. müqaviləsinə qarşı çıxır

    ABŞ-nin bir neçə ştatı Paramount-Skydance tərəfindən həyata keçirilməsi planlaşdırılan Warner Bros. şirkətinin 110 milyard dollarlıq satınalma müqaviləsinə qarşı məhkəmə iddiası qaldırmağa hazırlaşır. Reuters agentliyinin məlumatına görə, Kaliforniya, Nyu-York və adı açıqlanmayan digər ştatlar birləşmənin qarşısını almaq məqsədilə yaxın həftələrdə məhkəməyə müraciət edə bilərlər.

    Hazırda iddianın konkret detalları açıqlanmasa da, hüquqi etirazların əsasən antiinhisar narahatlıqları və sözügedən birləşmənin onsuz da çətin dövr yaşayan film və televiziya sənayesinə mənfi təsir göstərə biləcəyi ilə əlaqədar olacağı gözlənilir. Daha əvvəl Hollivud nümayəndələri və ABŞ senatorları da bu mövzuda oxşar narahatlıqlar səsləndirmişdilər.

    Hüquqi proses birləşməni tamamilə dayandırmasa belə, müqavilənin tamamlanmasını ciddi şəkildə gecikdirə bilər. Bu isə Paramount üçün əlavə maliyyə yükü yarada bilər. Məlumata görə, razılaşma oktyabr ayına qədər yekunlaşmasa, şirkət səhmdarlara hər gün təxminən 6,9 milyon dollar məbləğində ödəniş etməli olacaq.