iOS 17-də istifadəyə veriləcək yeni sistem tətbiqlərindən biri barəsində məlumat verilib

    Bloomberg saytının insayderi Mark Gurman bildirib ki, Apple şirkəti iOS 17 əməliyyat sisteminə  bir neçə yeni sistem tətbiqini inteqrasiya edəcək. İnsayder hətta istifadəyə veriləcək yeni sistem tətbiqlərindən biri barəsində məlumat da verib. Onun sözlərinə əsasən istifadəyə veriləcək yeni sistem tətbiqlərindən birində istifadəçilər öz fikirlərini qeyd edə biləcəklər. Daha sonra isə süni zəka sistemi qeyd edilmiş fikirləri analiz edərək istifadəçiyə gündəlik fəaliyyət ilə bağlı məsləhətlər verəcək. Məsələn sistem istifadəçiyə edilmiş idman məşqlərinin nəticələrini qeyd etməyi təklif edəcək.

    Bu cür qeydlərin əsasında sistem idman məşqləri ilə bağlı məsləhətlərini təqdim edə biləcək. İstifadəçinin digər insanlarla ünsiyyəti zamanı tətbiq həmin ünsiyyəti təyin edə və mətnli mesajların, telefon zənglərinin və ya digər bildirişlərin istifadəçiyə necə təsir göstərdiyini analiz edəcək. Ümumi olaraq yeni tətbiqin funksionallığı artıq mövcud olan Day One adlı tətbiqin funksionallığına bənzəyəcək. Qeyd etmək lazımdır ki, Day One tətbiqinin tərtibatçıları iOS 17-də olacaq oxşar tətbiq barəsində narahatlıq duyduqlarını söyləyiblər. Qeyd etmək lazımdır ki, iOS 17 5 iyun tarixində start götürəcək WWDC 2023 konfransı çərçivəsində təqdim ediləcək.