Google hakerlərə qarşı kiberhücumlar keçirtməyə başlayacaq

     Google kiberhücumlardan özünü və bəlkə də digər ABŞ təşkilatlarını qorumaqda daha aktiv mövqe tutmağı planlaşdırır - şirkətdə ehtimal edirlər ki, o, rəqəmsal müstəvidə hücum edən tərəfin rolunu da öz üzərinə götürə bilər. Yaxın aylarda Google kibercinayətkarlarla mübarizə üçün “aktiv qarşıdurma qrupu” yaratmağı planlaşdırır, bunu Google Threat Intelligence Group bölməsinin vitse-prezidenti Sandra Joyce bildirib. “Biz Google Threat Intelligence Group olaraq müəyyən kampaniyaların və ya əməliyyatların qarşısını faktiki şəkildə almaq imkanlarını proaktiv şəkildə müəyyənləşdirməklə məşğuluq. Əgər vəziyyəti dərhal dəyişmək istəyiriksə, reaktiv mövqedən proaktiv mövqeyə keçməli olacağıq” - deyə o, mövzuya həsr olunmuş tədbirdə bəyan edib. Tədbirdən sonra isə “Qarşı hücum etmək, ya etməmək? Bax, məsələ burasındadır... yoxsa deyilmi?” adlı hesabat dərc olunub.

     Sənəddə ABŞ hakimiyyət orqanlarının özəl şirkətlərə hücum xarakterli kiberhücumlar həyata keçirməyə icazə verib-verməməli olduğu, rəqəmsal müstəvidən kənar təsirin rəqibləri səmərəli şəkildə cilovlaya bilib-bilməyəcəyi və ya resursların kibermüdafiə vasitələrinin təkmilləşdirilməsinə yönəldilməsinin daha məqsədəuyğun olub-olmaması kimi ideyalar müzakirə olunur. İyul ayında ABŞ Konqresi “Big Beautiful Bill” adlı qanun layihəsini qəbul edib. Bu sənəd, o cümlədən, hücum xarakterli kiber əməliyyatlar üçün 1 milyard dolların ayrılmasını nəzərdə tutur. Bu, Google kimi şirkətlərin dərhal hansısa resursları sındırmağa başlayacağı demək deyil, lakin ABŞ siyasətinin bu mövzuda gələcək istiqamətini əks etdirir - ən azı hazırkı prezident administrasiyası tərəfindən.

     Avqustun 15-də isə “2025-ci il üçün fırıldaqçı fermalara qarşı kapitanlıq şəhadətnamələri və repressiyalar haqqında qanun layihəsi” təqdim olunub. Bu layihə dövlət başçısına “Birləşmiş Ştatlara qarşı aqressiya aktı törətmiş cinayətkar təşkilat üzvü və ya kibercinayətlərdə iştirak edən hər hansı şəxs və ya onunla əlaqəli təşkilata qarşı kapitanlıq şəhadətnamələri və repressiyalar vermək” səlahiyyəti verir. Yelkənli donanma dövründə kapitanlıq şəhadətnamələri dövlət adından özəl gəmilərə quldur üsulları ilə fəaliyyət göstərməyə icazə verən sənədlər idi. Repressiyalar isə bir dövlətin digər dövlətin qanunsuz hərəkətlərinə cavab olaraq tətbiq etdiyi siyasi və ya iqtisadi xarakterli məcburi tədbirlər idi - indi bu tədbirlər sanksiyalar adlanır. Beləliklə, ABŞ hakimiyyəti siqnal verir ki, başqa ölkələrin kibercinayətkarlarının ABŞ təşkilatlarına hücum etmək istəyini boğmaq üçün ən sərt tədbirlərə hazırdır. Hələlik təşəbbüs konkret forma almayıb.