Hakerlər, cəsuslar və kibertəhlükəsizlik mütəxəssisləri aktiv şəkildə süni intellektdən istifadə edirlər

     Kibercinayətkarlar və onlardan cəmiyyəti qorumağa çalışan kibertəhlükəsizlik mütəxəssisləri getdikcə daha çox süni intellekt sistemlərinə müraciət edirlər - ictimaiyyətə açıq alətlərin effektivliyi artır. Nəticədə süni intellekt özü ilə qarşı-qarşıya gəlir, həm hücumda, həm də müdafiədə rol oynayır. “Müxtəlif səviyyələrdə olan hakerlər - kibercinayətkarlar, casuslar, tədqiqatçılar və korporativ təhlükəsizlik üzrə mütəxəssislər - son aylarda süni intellekt alətlərindən istifadə etməyə başlayıblar. ChatGPT kimi böyük dil modelləri hələ də səhvlərə yol verir. Lakin bu modellər dil sorğularını emal etmək, sadə dili kompüter koduna çevirmək, sənədləri tanımaq və onların məzmununu xülasələşdirmək sahəsində olduqca uğurlu nəticələr göstəriblər” - deyə qeyd edilib.

     Google süni intellektdən sistem boşluqlarını aşkar etmək üçün istifadə edir, CrowdStrike adlı kibertəhlükəsizlik şirkəti isə hücum qurbanı olduğunu anlayanlara yardım göstərir. Həmçinin, Xbow adlı startap HackerOne platformasında ABŞ üzrə reytinqin zirvəsinə yüksələn bir süni intellekt hazırlayıb. CrowdStrike bütöv bir kampaniyanı ifşa edib. Bu kampaniya çərçivəsində Şimali Koreya hakimiyyətinin agentləri generativ süni intellektdən istifadə edərək işə qəbul üçün saxta CV-lər hazırlayır, sosial şəbəkələrdə profillər yaradır və idarə edir, eləcə də digər materiallar yayımlayırdılar. Bütün bunlar Qərb texnologiya şirkətlərini aldadaraq həmin agentləri işə götürməyə yönəlmişdi. İşə qəbul olunduqdan sonra Şimali Koreya agentləri süni intellektin köməyi ilə həmkarları ilə ünsiyyət qurur, proqram kodu yazır və normal həyat təsiri bağışlayaraq maaş almağa davam edirdilər.

     Müasir süni intellekt vasitələri sənədlərlə işləməkdə faydalı ola biləcəyini sübut edib, lakin süni intellektlə edilən kütləvi sındırma dövrünün başladığını demək hələ tezdir - bu, daha çox effektivliyi artıran vasitədir, insanın əvəzləyicisi deyil. Google şirkətinin texniki təhlükəsizlik üzrə vitse-prezidenti Heather Adkins izah edib ki, o hələ “kimin isə süni intellekt vasitəsilə yeni bir şey kəşf etdiyini görməyib” - süni intellekt “sadəcə bizim onsuz da bacardığımız işləri daha tez yerinə yetirir”. Açıq mənbə layihəsi cURL-ün aparıcı tərtibatçısı Daniel Stenberg isə süni intellektin geniş yayılması ilə bağlı narahatlığını bildirib. O, tətbiqdə guya aşkar edilmiş boşluqlara dair süni intellekt tərəfindən göndərilən saxta bildirişlər ilə qarşılaşıb. 2025-ci ilin əvvəlindən gələn boşluq bildirişlərinin yalnız 5%-nin real olduğunu müəyyənləşdirib, lakin hər birini yoxlamaq məcburiyyətində qalıb.