Google Play yeni “Game Trials” funksiyasını təqdim etdi

    Technote.az “Engadget” platformasına istinadən bildirir ki, Google Play istifadəçilərin ödənişli oyunları satın almadan əvvəl sınaya bilməsi üçün yeni Game Trials funksiyasını təqdim edib. Yeni imkan sayəsində oyunçular müəyyən pullu oyunları məhdud vaxt ərzində pulsuz oynayaraq oyunun özlərinə uyğun olub-olmadığını yoxlaya biləcəklər.

    Funksiya artıq mobil platformada seçilmiş ödənişli oyunlar üçün mərhələli şəkildə istifadəyə verilir və yaxın zamanda Google Play Games platforması vasitəsilə PC istifadəçilərinə də təqdim olunacaq. Game Trials dəstəyi olan oyunların səhifəsində xüsusi “Try” düyməsi görünəcək. İstifadəçi bu düyməyə klik etdikdə, oyunu nə qədər müddət pulsuz oynaya biləcəyini əvvəlcədən görə biləcək.

    Google-un təqdim etdiyi nümunəyə əsasən, sağ qalma və qorxu janrında olan Dredge oyunu istifadəçilərə 60 dəqiqəlik pulsuz oyun imkanı təqdim edir. Vaxt bitdikdən sonra istifadəçiyə oyunu satın almaq və ya cihazdan silmək seçimi təklif olunur.

    Şirkət həmçinin yaxın aylarda Play Store-a daha çox ödənişli indie oyunun əlavə ediləcəyini açıqlayıb. Bu oyunlar arasında Moonlight Peaks, Sledding Game və Low-Budget Repairs də yer alır. Bundan əlavə, Windows PC üçün optimallaşdırılmış oyunları önə çıxaran yeni bölmə də istifadəyə verilib və istifadəçilər oyunları arzu siyahısına əlavə edərək endirim zamanı bildiriş ala biləcəklər.