iPhone XS smartfonu vintaj cihazlar siyahısına daxil edilib

     Apple rəsmi olaraq iPhone XS modelini vintaj cihazlar siyahısına daxil edib. Şirkətin qaydalarına görə, hər hansı bir cihazın satışdan çıxarılmasından 5 il keçdikdə ona bu status verilir. Avtorizə olunmuş servis mərkəzləri bu cihazları təmir etməyə davam edə bilərlər, lakin yalnız lazım olan ehtiyat hissələri mövcuddursa. iPhone XS 2018-ci ilin sentyabrında təqdim olunmuşdu, lakin Apple bu modelin istehsalını satışdan cəmi 1 il sonra dayandırdı. Bununla belə, bəzi satıcılarda bu model bir müddət daha satışda qaldığı üçün vintaj statusu üçün tələb olunan 5 illik müddət yalnız indi tamamlanıb.

     Macrumors-un məlumatına görə, daha 2 ildən sonra bu model tamamilə köhnəlmiş cihazlar kateqoriyasına keçəcək və Apple onun rəsmi servis xidmətini tamamilə dayandıracaq. 2024-cü ilin noyabr ayında Apple artıq iPhone XS Max modelini vintaj cihaz kimi tanımışdı. Ümumilikdə, iPhone X modeli ilə müqayisədə XS modeli cüzi təkmilləşdirmələrə sahib idi - daha güclü A12 Bionic prosessoru, təkmilləşdirilmiş kameralar və iki SIM-kart dəstəyi.

     XS Max versiyası isə 6.5 düymlük daha böyük ekranla fərqlənirdi. Bundan əlavə, Apple iPad 5 planşetini vintaj cihazlar siyahısından çıxararaq onu tamamilə köhnəlmiş cihazlar kateqoriyasına keçirib. Həmçinin, şirkətin saytında 2018-ci il istehsalı olan Mac mini sahibləri üçün xəbərdarlıq yerləşdirilib - cihazın xidmət statusunu dəqiqləşdirmək üçün avtorizə olunmuş servis mərkəzlərinə müraciət etmək tövsiyə olunur. Bu kompüter cəmi bir neçə ay əvvəl Apple tərəfindən vintaj elan edilib.