MSI yeni portativ oyun konsolu üzərində çalışır

Cihazlar+

13.01.2025

Emil

Portativ oyun konsolları bazarında indiyədək belə güclü rəqabət olmayıb. Nintendo Switch və Steam Deck kimi portativ oyun konsollarının böyük uğur qazanmalarından sonra bazarda Lenovo Legion Go, MSI Claw, ASUS ROG Ally kimi digər portativ oyun konsolları da satışa çıxdılar. Lakin şirkətlər bunlarla yetinmək niyyətində deyillər. Məsələn artıq geridə qalmış CES 2025 sərgisi çərçivəsində Lenovo şirkəti Lenovo Legion Go S-i, Acer şirkəti isə Nitro Blaze 8 ilə Nitro Blaze 11-i təqdim etdi. İnsayderlərin vermiş olduqları məlumata əsasən MSI şirkəti öz yeni portativ oyun konsolunu hazırlamağa başlayıb.

Məlumatda qeyd edilib ki, MSI tərəfindən hazırlanan yeni portativ oyun konsolu Windows əməliyyat sistemini əldə edəcək. Onun hal-hazırda aktual olan MSI Claw modelindən əsas fərqi ondan ibarət olacaq ki, o, Intel Core Ultra prosessoru əvəzinə AMD-nin xüsusi olaraq portativ oyun konsolları üçün nəzərdə tutulmuş AMD Ryzen Z2 prosessoru vasitəsilə çalışacaq. Qeyd etmək lazımdır ki, CES 2025 sərgisi çərçivəsində təqdim edilmiş Lenovo Legion Go S də məhz bu prosessor ilə təchiz olunub. İnsayderlər MSI tərəfindən hazırlanan yeni portativ oyun konsolunun adı, digər texniki göstəriciləri və onun nə zaman təqdim olunacağı barəsində bir məlumat verməyiblər.

Paylaş

msi

Bənzər xəbərlər