Nvidia yeni tətbiq yeniləməsini təqdim etdi

    Technote.az “The Verge” platformasına istinadən bildirir ki, Nvidia yeni tətbiq yeniləməsini istifadəyə verib. Yeniləmə DLSS 4.5 Super Resolution texnologiyasını və Nvidia Control Panel-dən köçürülən əlavə funksiyaları özündə birləşdirir. DLSS 4.5, DLSS 4-də müşahidə olunan görüntü artefaktlarını azaltmaq və ümumi görüntü keyfiyyətini artırmaq üçün hazırlanmış ikinci nəsil Super Resolution transformer modeli ilə təchiz olunub.

    Ayın əvvəlində Nvidia tətbiqinin beta versiyasında təqdim edilən DLSS 4.5 artıq bütün RTX istifadəçiləri üçün əlçatandır. Genişləndirilmiş məlumat dəsti üzərində təlim keçən yeni model, xüsusilə DLSS Performance və Ultra Performance rejimlərində görüntü aydınlığını və sabitliyini nəzərəçarpacaq dərəcədə yaxşılaşdırır.

    Bundan əlavə, DLSS 4.5 RTX 50 seriyalı videokartlar üçün 6x Multi Frame Generation və Dynamic Multi Frame Generation kimi yeni rejimlər də təqdim edir. Lakin Nvidia bildirib ki, bu funksiyalar yalnız 2026-cı ilin yaz aylarında aktiv olacaq.

    Nvidia tətbiqinin 11.0.6 versiyası ilə yanaşı, köhnə Control Panel-dən qalan Nvidia Surround ayarları da tətbiqə əlavə edilib. Artıq bezel correction və klaviatura qısa yolları (hotkeys) da mövcuddur. Şirkət son illər ərzində Control Panel və GeForce Experience-i vahid Nvidia tətbiqi altında birləşdirmək istiqamətində addımlar atır.

    İstifadəçilər yeniləməni avtomatik olaraq əldə edə və ya Nvidia-nın rəsmi saytından manuel şəkildə yükləyə bilərlər. DLSS 4.5-dən istifadə etmək üçün ən son Game Ready sürücüsünün quraşdırılması da tələb olunur.