Qatlana bilən OPPO Find N3 təqdim olunub - QİYMƏTİ

Cihazlar+

19.10.2023

Emil Nəcəfov

OPPO şirkəti Çində öz yeni qatlana bilən smartfonu OPPO Find N3-ü təqdim edib. OPPO bu yeni qatlana bilən smartfonda kompakt ölçülü qatlana bilən smartfonlar konsepsiyasından kənara çəkilib. Çünki OPPO Find N3 böyük ölçülü həm daxili həm də xarici ekranı əldə edib. Belə ki, OPPO Find N3 smartfonu 1 Hz-dən 120 Hz-ə kimi adaptiv təsvir yenilənməsinə sahib 2440x2268 piksel keyfiyyətli 7.82 düym daxili AMOLED ekran və 120 Hz-ə kimi təsvir yenilənməsinə sahib 2484x1116 piksel keyfiyyətli 6.31 düym xarici AMOLED ekran ilə təchiz olunub. Həm daxili ekranın həm də xarici ekranın maksimal parlaqlıq səviyyəsi 2800 nit təşkil edir.

Məlumatda qeyd edilib ki, smartfonda istifadə edilən yeni şarnir konstruksiyası hesabına OPPO Find N3 1 milyon qatlanma dövrünə tab gətirə bilir. Üstəlik smartfondakı şarnir konstruksiyasının kiçik ölçüdə olması hesabına OPPO Find N3-ün qalınlığını və çəkisini azaltmaq mümkün olub. Belə ki, OPPO Find N3 tam açıq vəziyyətdə 5.8 mm qalınlığa, qatlanmış vəziyyətdə isə 11.7 mm qalınlığa sahibdir. Onun çəkisi 239 qramm təşkil edir. Üstəlik smartfonun gövdəsi IPX4 standartı üzrə sudan qorunur. Barmaq izi skanı texnologiyası yandırıb/söndürmə düyməsinə inteqrasiya edilib.

OPPO Find N3 özündə həmçinin Dolby Atmos dəstəkli stereo səsgücləndiriciləri və kontaktsız ödənişlər üçün nəzərdə tutulmuş NFC çipini birləşdirir. Əsas texniki göstəricilər gəldikdə isə smartfon Snapdragon 8 Gen 2 prosessoru, 12/16 GB RAM, 512 GB/1 TB daxili yaddaş həcmi, 48 MP (f/1.7 diafraqmaya, avtofokusa və optik stabilizasiyaya sahib Sony Lytia T808) + 48 MP (f/2.2 diafraqmaya, avtofokusa və 114 dərəcə bucaq əhatəsinə sahib Sony IMX581) + 64 MP (f/2.6 diafraqmaya, 3 qat optik zoom-a, 120 qat rəqəmsal zoom-a və optik stabilizasiyaya sahib OmniVision OV64B) üçlü arxa kamera, daxili ekran üzərində 20 MP-lik ön kamera, xarici ekran üzərində 32 MP-lik ön kamera və 67 vatt gücündə sürətli şarj texnologiyalı 4805 mAh enerji tutumlu batareya ilə təchiz olunub.

OPPO Find N3 Android 13 vasitəsilə çalışır. OPPO bildirib ki, sözügedən yeni qatlana bilən smartfon 4 il dəstək müddətinə sahib olacaq. Smartfon 3 il ərzində Android dəstəyini və 4 il ərzində təhlükəsizlik dəstəyini əldə edəcək. OPPO Find N3 yaxın günlərdə Çində satışa çıxacaq. 12 GB RAM-a və 512 GB yaddaşa sahib model 1366$-a, 16 GB RAM-a və 1 TB yaddaşa sahib model isə 1746$-a satılacaq. Qeyd etmək lazımdır ki, OPPO Find N3 qlobal bazarda OnePlus Open adı altında satışa çıxacaq.

Linki kopyala

oppo

oppo foldable phone

oppo foldable phone 2023