Samsung Galaxy S26 üçün yeni AI foto redaktə alətini anons etdi
Technote.az “Mashable” platformasına istinadən bildirir ki, Samsung qarşıdan gələn flaqman smartfonları üçün yeni süni intellekt əsaslı foto redaktə alətlərini anons edib. Şirkət qısa video tizerlər vasitəsilə istifadəçilərin şəkilləri daha sürətli və yaradıcı şəkildə redaktə edə biləcəyini göstərib.
Rəsmi açıqlamada konkret olaraq model adı çəkilməsə də, “ən son Galaxy smartfonu” ifadəsi işlədilib. Lakin texnologiya dairələrində gözlənti ondan ibarətdir ki, bu funksiyalar gələn həftə keçiriləcək Galaxy Unpacked tədbirində təqdim ediləcək Samsung Galaxy S26 seriyasında yer alacaq. Samsung-un paylaşdığı tizerlərə əsasən, foto və video çəkilişi ilə redaktə prosesi vahid tətbiq daxilində birləşdiriləcək. Bu isə istifadəçilərin müxtəlif tətbiqlər arasında keçid etmədən bütün redaktə işlərini bir məkanda həyata keçirməsinə imkan verəcək.
Nümayiş olunan imkanlar arasında:
- Gündüz çəkilmiş fotonu gecə görüntüsünə çevirmək
- Bir neçə şəkli birləşdirərək tək kompozisiya yaratmaq
- AI vasitəsilə səhnə dəyişiklikləri və kreativ düzəlişlər etmək
Galaxy smartfonları artıq Google Gemini əsaslı süni intellekt imkanlarından istifadə edir. Xüsusilə generativ foto redaktə sahəsində Gemini-nin imkanları bazarda ən güclü həllərdən biri hesab olunur. Yeni redaktə paketi bu inteqrasiyanı daha da dərinləşdirə bilər. Samsung bildirib ki, bu xüsusiyyətlərlə bağlı daha ətraflı məlumat Galaxy Unpacked tədbirində açıqlanacaq. Hazırda təqdim olunan məlumatlar qısa və ümumi xarakter daşıyır.
Paylaş
