Smartfon dünyasında böyük dəyişikliklər

    Technote.az “GSMArena” platformasına istinadən bildirir ki, Asus rəsmi olaraq smartfon istehsalını dayandırdığını açıqladı. Şirkət bundan sonra resurslarını kommersiya məqsədli kompüterlər, elmi-tədqiqat işləri və “fiziki süni intellekt” adlandırdığı sahələrə, yəni robototexnika və ağıllı eynəklərə yönəldəcək. Bununla belə, Asus mövcud smartfon modelləri üçün proqram təminatı və texniki dəstəyi davam etdirəcəyini bildirib.

    Bununla belə, Samsung Galaxy S26 seriyası ilə bağlı yeni tarixlər də ortaya çıxıb. Məlumata görə, Samsung yeni flaqmanlarını 25 fevral tarixində təqdim edəcək. Ön sifarişlər 26 fevralda başlayacaq və 4 martda başa çatacaq. 5–10 mart tarixlərində ön satış mərhələsi keçiriləcək, ümumi satış isə 11 martdan start götürəcək. Bundan əlavə, Galaxy S26 Ultra modelinin əvvəl gözləniləndən daha çox rəng variantı ilə təqdim olunacağı bildirilir.

    Həftə ərzində OnePlus brendinin bazardan çəkiləcəyi ilə bağlı yayılan iddialar da gündəm oldu. Lakin şirkət rəsmi açıqlama verərək bu məlumatları təkzib edib və fəaliyyətini davam etdirdiyini bildirib.

    Honor isə yeni Magic8 Pro Air modelini təqdim edib. Smartfon 6,3 düymlük ekran, 5 500 mAh batareya və güclü kamera sistemi ilə təchiz olunub. Qurğuda 50 MP ön kamera, 50 MP ultra-geniş bucaq, 64 MP telefoto və 50 MP əsas kamera yer alır.

    Orta seqment üçün nəzərdə tutulan Samsung Galaxy A57 modelinin texniki xüsusiyyətləri TENAA sertifikatlaşdırma bazasında ortaya çıxıb. Telefonda 6,6 düymlük ekran, 2,9 GHz-ə qədər çalışan prosessor və Exynos 1680 çipi istifadə olunacaq. Kamera sistemi 50 MP əsas, 12 MP və 5 MP köməkçi sensorlardan, ön hissə isə 12 MP selfi kamerasından ibarət olacaq.

    Performans yönümlü iQOO 15 Ultra isə smartfonlarda indiyə qədər görülmüş ən böyük fiziki soyutma ventilyatoru ilə diqqət çəkir. Qurğu AnTuTu testində 4,5 milyon nəticə göstərərək rekord səviyyəyə çatıb.

    Apple tərəfdə isə gələcəyə dair maraqlı sızıntılar var. iPhone 18 Pro modellərinin LTPO+ OLED ekranlarla təchiz ediləcəyi bildirilir. Bu texnologiya daha az enerji sərfiyyatı ilə yanaşı, Face ID üçün istifadə olunan infraqırmızı kameranın ekranın altına yerləşdirilməsinə imkan verəcək və nəticədə “pill” kəsiyi daha da kiçiləcək.