Whoop qadın sağlamlığı üçün yeni qan testi funksiyasını təqdim etdi

    Technote.az “TechCrunch” platformasına istinadən bildirir ki, ABŞ-də fəaliyyət göstərən Whoop fitness texnologiya şirkəti qadın sağlamlığına yönəlmiş yeni qan analizi panelini təqdim etdiyini açıqlayıb. Şirkət həmçinin mobil tətbiqində menstrual dövr zamanı hormonal dəyişiklikləri analiz edən yeni funksiyanı da istifadəyə verəcəyini bildirib.

    Şirkətin yaratdığı Whoop Labs qan test xidməti çərçivəsində təqdim olunan yeni panel qadın sağlamlığı ilə bağlı 11 əsas biomarkeri ölçür. Bu biomarkerlərə Anti-Müllerian Hormonu (AMH), Progesteron, Prolaktin, Thyroid Peroxidase Antibodies (TPOAb), Free T4, Free T3, Leptin, Vitamin B12 (Kobalamin), Folat, Maqnezium və Fosfat daxildir. Şirkətin açıqlamasına görə, bu göstəricilərin ölçülməsi istifadəçilərə menstrual dövrün tənzimlənməsi, hormonal dəyişikliklər, perimenopauza mərhələsi, qalxanabənzər vəzinin fəaliyyəti, qida maddələrinin kifayətliliyi və sümük sağlamlığı haqqında daha geniş məlumat əldə etməyə kömək edəcək. Nəticələr istifadəçinin fiziki aktivlik, yuxu və bərpa məlumatları ilə birlikdə analiz ediləcək.

    Yeni qan testi gələn aydan etibarən istifadəçilər üçün satışa çıxarılacaq. Qeyd edək ki, Whoop şirkəti qan test xidmətini ilk dəfə 2025-ci ilin sentyabrında təqdim edəndə bu xidmət üçün 350 mindən çox insan gözləmə siyahısında idi. Whoop şirkətinin məlumatına görə, son bir ildə qadın istifadəçilərin sayı 150 % artıb və bu qrup şirkətin ən sürətlə böyüyən istifadəçi seqmentinə çevrilib. Bundan əlavə, qadın istifadəçilər şirkətin Whoop AI funksiyasından təxminən 30 % daha çox istifadə edirlər.