Tesla Roadster avtomobili üçün 50 000 dollar behlə yenidən rezervasiya açdı

    “Tesla” uzun müddətdir gözlənilən yeni nəsil “Roadster” üçün rezervasiyaları yenidən açıb. Şirkət elektrik idman avtomobilini oktyabrın 1-də ABŞ-nin Texas ştatının Vako şəhərində göstərəcək. Model ilk dəfə 2017-ci ildə nümayiş etdirilib, lakin həmin vaxtdan sifariş gözləyən müştərilər avtomobillərini hələ də almayıblar.

    Rezervasiya üçün 50 000 dollar (85 000 manat) beh ödənməlidir. Əvvəlcə kredit və ya debet kartından 5 000 dollar (8 500 manat) tutulur. Bu məbləğ tam geri qaytarıla bilər. İstehsal növbəsinə düşmək üçün qalan 45 000 dollar (76 500 manat) 10 gün ərzində bank köçürməsi ilə ödənməlidir. Avtomobilin yekun satış qiyməti hələ açıqlanmayıb.

    İlk nümayiş zamanı “Founders Series” versiyası üçün əlavə 250 000 dollar (425 000 manat) qiymət açıqlanmışdı. Xüsusi versiyanın 2020-ci ildə hazır olacağı deyilirdi. Həmin vaxt avtomobilin 970 km-dən çox məsafə qət edəcəyi və saatda 97 km sürətə 2 saniyədən az müddətdə çatacağı vəd olunmuşdu. Maksimal sürətin də 402 km/saatdan yüksək olacağı deyilirdi. Bu göstəricilərin yeni modeldə qalıb-qalmayacağı bəlli deyil.

    Yeni “Roadster” modelinin texniki quruluşu barədə rəsmi məlumat azdır. Ehtimallara görə, avtomobilə “SpaceX” istehsalı olan soyuq qaz itələyiciləri qoyula bilər. Bu qurğu əlavə təkan yaradaraq avtomobilin daha sürətli hərəkətə başlamasına kömək edə bilər. Modelin ilkin prototiplə müqayisədə “Cyber” üslubunda yenidən hazırlandığı da iddia olunur. “Tesla” rəhbəri Elon Musk nümayişin süni intellektlə (AI) yaradılmadığını təsdiqləmək üçün tədbirə tamaşaçıların çağırılacağını deyib.

    “Tesla” 2023-cü ildə göstərilən “Cybertruck” pikapından sonra tamamilə yeni model satışa çıxarmayıb. Pikapın satışları ilk nümayişdən sonra kəskin azalıb. Avtomobilin bir dolumla qət etdiyi məsafə, yolsuzluq bacarığı, yığım keyfiyyəti və qiyməti də mübahisə doğurub. Yeni “Roadster” modelinin istehsalına nə vaxt başlanacağı və əvvəlki sifarişlərin nə zaman çatdırılacağı hələ açıqlanmayıb.