Waymo 6-cı nəsil robotaksi sistemini təqdim etdi

    Technote.az “Gizmodo” platformasına istinadən bildirir ki, Waymo şirkəti yeni altıncı nəsil avtonom idarəetmə sistemini rəsmi şəkildə istifadəyə verib. Şirkət artıq əməkdaşlarına və qonaqlara bu sistemlə təchiz olunmuş robotaksilərdə sınaq səfərlərinə başlamağa icazə verir.

    Yeni sistem əsasən Çin avtomobil istehsalçısı Geely tərəfindən təqdim olunan baza avtomobillər üzərində qurulan “Ojai” robotaksilərində tətbiq edilir. Waymo-nun mühəndislik üzrə vitse-prezidenti Satiş Ceyachandran bildirib ki, bu sistem şirkətin növbəti genişlənmə mərhələsinin əsas texnoloji platformasıdır. Onun sözlərinə görə, sistem daha sadələşdirilmiş arxitekturaya malikdir, xərcləri azaldır və təhlükəsizlik standartlarını qoruyur.

    Altıncı nəsil Waymo Driver sistemi daha sərfəli komponentlərlə hazırlanıb və müxtəlif mühitlərdə, o cümlədən sərt qış şəraitində işləmək üçün optimallaşdırılıb. Sistemə yeni 17 meqapiksellik yüksək keyfiyyətli kamera (imager) əlavə olunub. Bu sensor milyonlarla məlumat nöqtəsini toplayaraq avtomobilin ətraf mühitini daha detallı görməsinə imkan verir. Şirkətin iddiasına görə, yüksək keyfiyyətli görüntü sayəsində daha az sayda kamera ilə eyni və ya daha yaxşı nəticə əldə etmək mümkündür.

    Bundan əlavə, daha effektiv və münasib qiymətli lidar və radar sensorlarından istifadə olunur. Yeni sistem fərqli avtomobil modellərinə inteqrasiya oluna biləcək şəkildə hazırlanıb. Hazırda bu texnologiya həm Ojai robotaksilərində, həm də Hyundai Ioniq 5 elektrik SUV modellərində tətbiq edilir. Waymo-nun əvvəlki parkında istifadə edilən Jaguar I-Pace avtomobilləri isə hələ də beşinci nəsil sistemlə işləyir. Şirkət ötən il bu model üzrə son avtomobil partiyasını qəbul etdiyini açıqlamışdı.

    Waymo bildirir ki, Arizona ştatının Feniks şəhərində yerləşən zavodunda yeni sistemlə təchiz olunmuş avtomobillərin istehsalını ildə on minlərlə ədədə çatdırmağı planlaşdırır. Hazırda Waymo robotaksi xidməti Ostin, San-Fransisko, Feniks, Atlanta, Los-Anceles və Mayami şəhərlərində fəaliyyət göstərir.