Xiaomi-nin ilk avtomobili 500 min satış həddini keçib

    Xiaomi-nin avtomobil bazarındakı ilk modeli olan SU7 sedanının ümumi çatdırılma sayı 500 mini keçib. Şirkət bu göstəriciyə ilk avtomobilin müştəriyə təqdim edilməsindən təxminən 28,5 ay sonra, avqustun 17-də çatıb. 500 min avtomobil Xiaomi kimi avtomobil sənayesinə yeni daxil olmuş şirkət üçün mühüm nəticədir. Lakin 2026-cı ilin göstəriciləri SU7-yə tələbatın nəzərəçarpacaq dərəcədə azaldığını göstərir.

    Xiaomi ilin ilk 7 ayında 101 540 ədəd SU7 çatdırıb. Bu, ötən ilin eyni dövrü ilə müqayisədə 43,6% azdır. Maraqlıdır ki, eyni müddətdə Xiaomi-nin bütün avtomobillərinin ümumi çatdırılması 14,8 % artaraq 216 322 ədədə çatıb. Başqa sözlə, problem Xiaomi-nin avtomobil biznesində deyil, məhz SU7 modelindədir. Bunun əsas səbəblərindən biri şirkətin daha yeni YU7 SUV modelinin satışa çıxmasıdır. Tesla Model Y-yə rəqib kimi hazırlanan YU7 Xiaomi-nin öz sedanından da müştəri cəlb etməyə başlayıb.

    İyul ayında Xiaomi 21 044 SU7 və 10 223 YU7 çatdırıb. Bununla belə, YU7-nin iyul göstəricisi də iyun ayındakı 14 324 avtomobillə müqayisədə 28,6 % aşağı olub. Şirkət üçün əsas çətinlik isə 2026-cı il üzrə 550 min avtomobil çatdırmaq hədəfidir. Xiaomi ilin ilk yeddi ayında bu hədəfin cəmi 39 %-nə çatıb. İlin sonuna qədər planı yerinə yetirmək üçün şirkət qalan beş ay ərzində orta hesabla ayda təxminən 67 min avtomobil çatdırmalıdır. Hazırkı aylıq temp isə təxminən 31 min avtomobildir.