Alibaba süni intellekt əsaslı Qwen-Image adlı foto generatoru təqdim edib

     Alibaba, görüntülərlə işləmək üçün nəzərdə tutulmuş Qwen-Image 20B MMDiT adlı süni intellekt modelini təqdim edib. Bu modeldə tərtibatçılar mürəkkəb mətnlərin vizual təsvirini əhəmiyyətli dərəcədə yaxşılaşdırıb və görüntülərin dəqiq redaktə olunması imkanlarını reallaşdırıblar. Bu modelə Qwen Chat platformasında “Şəkil generasiyası” bölməsi vasitəsilə giriş mümkün olacaq. Model mətnlərin vizual təqdimatında geniş imkanlara malikdir - abzas səviyyəsində semantikaya sahib çoxsətrli mətn düzülüşlərini və detallı elementləri dəqiq şəkildə göstərə bilir. Həm əlifba əsaslı, həm də heroqlif əsaslı dilləri dəstəkləyir. 

     Təkmilləşdirilmiş çoxtapşırıqlı öyrənmə mexanizmləri, görüntülərin mənasını və vizual reallığını qorumaqla daha geniş redaktə imkanlarının əldə olunmasına şərait yaradıb. Alibaba-nın bildirdiyinə görə, yeni Qwen-Image modeli bir sıra görüntü generasiyası və redaktəsi testlərində mövcud həlləri geridə qoyub. Bu testlərə GenEval, DPG, OneIG-Bench, GEdit, ImgEdit və GSO daxildir. Xüsusilə mətnin vizual şəkildə dəqiq əks olunması ilə bağlı testlərdə - LongText-Bench, ChineseWord və TextCraft - model böyük uğurlar əldə edib və müasir alternativlərini geridə qoyub.

     Qwen-Image, xüsusilə, mağaza vitrinlərindəki çin heroqliflərinin düzgün fokus dərinliyi ilə dəqiq təsvirində, kitab üzlükləri və informasiya slaydlarında detallı ingiliscə mətnlərin yaradılmasında uğurla işləyir və ikidilli məzmunla işləməyi də dəstəkləyir. Mətnin işlənməsi ilə yanaşı, model foto-realizmdən impressionizmə qədər müxtəlif bədii janrlarda sərbəst şəkildə istiqamət ala bilir. O, görüntü redaktəsi zamanı müxtəlif əməliyyatları dəstəkləyir - üslubun dəyişdirilməsi, detalların əlavə edilməsi, silinməsi və təkmilləşdirilməsi, mətnin redaktəsi və obrazların pozalarının dəyişdirilməsi daxil olmaqla. Alibaba-nın Qwen-Image layihəsindəki tərtibatçılarının sözlərinə görə, şəkil generasiyası sahəsinin inkişafına töhfə vermək, vizual materialların yaradılmasında texniki baryerləri azaltmaq və həmkarlarını innovativ tətbiqlərə ruhlandırmaq məqsədi daşıyıblar.