Apple-ın Siri-yə süni zəkanın uğursuz inteqrasiyasının səbəbi məlum olub

     Bu günlərdə The Information nəşrinin jurnalisti Wayne Ma geniş bir hesabat yayımlayıb. Hesabatda Apple-ın Siri üçün nəzərdə tutulan süni zəkanın yenidən işlənməsi prosesində uğursuzluğa düçar olduğu ətraflı təsvir olunur. Ma-nın fikrincə, şirkətin süni zəkanı tətbiq etməkdə yaşadığı problemlərin əsas səbəbləri bunlardır: Apple-ın istifadəçi məxfiliyinə qarşı sərt və kompromisssiz mövqeyi və və zəif idarəetmə. Apple-ın süni zəka və machine learning (AI/ML) sahəsində daha əvvəl çalışmış bir neçə keçmiş əməkdaşı The Information-a bildiriblər ki, Siri-nin yeni versiyasının hazırlanmasında yaranmış problemlərin başlıca səbəbi məhz zəif rəhbərlik olub. Xüsusilə çoxlu tənqidlər Robert Walker-ə yönəlib. Bildirilir ki, onun nə gələcəklə bağlı ambisiyası, nə də səsli köməkçinin yeni versiyalarını yaratmaq üçün riskə getmək istəyi olub.

     Apple-ın digər bölmələrində çalışan bir çox əməkdaş, süni zəka və machine learning qrupunu istehza ilə “AIMLess” adlandırırdılar. Bu ifadə qurumun məqsədsiz və nəticəsiz işlədiyinə, eləcə də heç bir real uğur qazanmamasına eyhamdır. Keçən il keçirilmiş WWDC 2024 tədbirindən sonra Apple, süni zəka funksiyalarını nümayiş etdirməsinə görə ciddi tənqidlərə məruz qaldı, çünki görünən odur ki, bu funksiyaların işlək prototipləri belə mövcud deyildi. Wayne Ma qeyd edir ki, "Apple-da Siri komandası üçün həmin nümayiş tamamilə sürpriz olub". Keçmiş əməkdaşlardan birinin sözlərinə görə, o zaman təqdim edilən yeganə yeni funksiya, istifadəçi Siri-ni çağırdıqda iPhone ekranının kənarlarında görünən rəngli, hərəkətli işıq effektləri idi.

     Apple üçün belə bir təqdimat, əvvəlki praktikasından ciddi şəkildə fərqlənirdi. Ənənəvi olaraq şirkət yalnız artıq test qurğularında işləyən və marketinq komandası tərəfindən yoxlanılmış funksiyaları konfranslarda nümayiş etdirirdi - bununla onların vaxtında istifadəyə verilməsinə zəmanət verilirdi. Bu kontekstdə baxdıqda, Apple-ın ümumiyyətlə Siri üçün iOS 18.1 və 18.2 versiyalarında hər hansı yeni funksiya təqdim etməyi bacarması belə təəccüblü görünür. The Information-ın məlumatına görə, bu günə olan vəziyyət etibarilə Apple rəhbərliyi Siri-nin gələcəyi ilə bağlı daha optimist baxışlara malikdir. Bu da, əsasən, proqram təminatının hazırlanması üzrə baş vitse-prezident Craig Federighi-nin yeni süni zəka funksiyalarının inkişafında fəal iştirak etməsi ilə bağlıdır.

     Onun rəhbərliyi altında Apple daxilində “İntellektual sistemlər” adlı ayrıca süni zəka bölməsi yaradılıb. Hərçənd ki, AI/ML komandası hələ də süni zəka və machine learning üzrə baş vitse-prezident John Giannandrea-nın rəhbərliyi altında fəaliyyət göstərir, Wayne Ma-nın yazdığı məqalə yaxın gələcəkdə bu iki struktur arasında fikir ayrılıqları və qarşıdurmaların ola biləcəyinə işarə edir. Ma-nın sözlərinə görə, Federighi artıq Apple-da süni zəka ilə bağlı siyasəti ciddi şəkildə dəyişib: Əvvəllər mühəndislərə yalnız daxili modellərdən istifadə etməklə funksiyalar hazırlamaq tapşırılırdı, indi isə açıq mənbəli (open source) xarici modellərdən istifadə etməyə də icazə verilib.

Mənbə: The Information