Mac ikonlarını canlandıran IconSwapper proqramı 19 dollara təqdim edildi
Proqram Təminatı
20.11.2026
Dizayner Michael Flarup “Mac” üçün “IconSwapper” adlı yeni proqram çıxarıb. Tətbiqlə “Dock”dakı ikonlara şəkillər, vizual effektlər və proqramlardan alınan canlı məlumatlar əlavə etmək olur. “IconSwapper” həm “Intel”, həm də “Apple silicon” prosessorlu kompüterlərdə işləyir. Proqram üçün “macOS 14” və ya daha yeni sistem lazımdır.
Proqramın əsas funksiyalarından biri süni intellekt xidmətlərində istifadə limitinin nə qədər xərcləndiyini birbaşa ikonun üzərində göstərməkdir. Funksiya “ChatGPT”, “Claude”, “Cursor” və “Codex” ilə işləyir. İkon limitin işlədilən hissəsini göstərir, süni intellekt cavab hazırlayanda isə hərəkət edir. “Cursor” ikonunda faiz göstəricisi və həftəlik limitin nə vaxt yenilənəcəyi də görünür.
Canlı ikonlar yalnız süni intellekt tətbiqləri ilə məhdudlaşmır. “Spotify” və “Apple Music” hazırda dinlənilən albomu disk, vinil və ya disk qutusu formasında göstərə bilir. “Finder” ikonunun gözləri kursoru izləyir, “Safari” kompası fayl yüklənəndə reaksiya verir. “Mail” zərfi yeni məktub yazılarkən açılır. Proqram “Messages”, “Chrome” və digər tətbiqlərlə də işləyir.
İstifadəçi hazır ikonu dəyişə, öz şəklini yükləyə və ya icmanın hazırladığı minlərlə variant arasında seçim edə bilər. Rəngləri dəyişmək, “Gold” effekti, “Liquid Glass” görünüşü və müxtəlif bəzəklər əlavə etmək olur. Dəyişikliklər “Dock”da və “Command-Tab” keçidində görünür, amma tətbiqin “Finder”dəki əsas fayl ikonu dəyişmir. Bəzi canlı funksiyaları işlətmək üçün avtomatlaşdırma və əlçatanlıq icazələri lazımdır.
“IconSwapper” sistem ikonlarını dəyişmir. Bunun əvəzinə ikonların üzərində real vaxtda yeni görüntü yaradır. Proqram “Metal” qrafika texnologiyasından yararlanır, buna görə “macOS”da ikon mövzularını dəyişmək üçün ayrıca rəsmi dəstək lazım deyil. “IconSwapper” satışın ilk dövründə 19 dollara (təxminən 32 manat) satılır. Proqram sonradan 29 dollara satılacaq (təxminən 49 manat). 1 lisenziya 3 “Mac” kompüterini əhatə edir və ödəniş saytda “Stripe” ilə aparılır.
Şərhlər
Şərh yazmaq üçün Google və ya Facebook hesabınızla daxil olun.
Şərhlər yüklənir...
Ən çox oxunanlar