Google şirkəti generativ süni zəka texnologiyalarını müxtəlif məhsullarına inteqrasiya etmək niyyətindədir. Həmin məhsulların arasında fotoların saxlanması və redaktə edilməsi üçün nəzər də tutulmuş Google Photos servisi də var. Şirkət Google I/O 2023 konfransı çərçivəsində Google Photos üçün Magic Editor adlı yeni təcrübi funksiyanı təqdim edib. Sözügedən funksiya generativ süni zəka əsasında çalışır. Bu funksiya fotoları redaktə etməklə yanaşı onları yenidən çəkmək imkanını verir. Magic Editor vasitəsilə istifadəçi fotodakı obyektlərin yerlərini və ölçülərini dəyişə, lazım olmayan elementləri aradan qaldıra və ya məsələn buludlu havanı günəşli edə bilər.

    Qeyd etmək lazımdır ki, Google Photos-da daha öncə də süni zəka əsaslı funksiyalar istifadəyə verilib. Onlara misal olaraq fotolardakı lazımsız obyektləri silməyə imkan verən Magic Eraser-i və ya fotoların detalizasiyalarını yaxşılaşdıran Magic Unblur-u gətirmək olar. Lakin Magic Editor daha geniş imkanları təklif edəcək. Belə ki, sözügedən yeni funksiya kontentləri tərtib edə və redaktə olunmağa ehtiyac duyan fotoları yenidən çəkə biləcək. Magic Editor-un əsasında dayanan neyron şəbəkəsi reallıqda çəkilməmiş fotoların tərtib edilməsində də istifadə edilə bilər. Məlumata əsasən Magic Editor funksiyası bu ilin sonuna kimi bəzi Pixel smartfonlarında aktiv olacaq.