X Bluesky-ın “Starter Packs” funksiyasını öz platformasına gətirir

     Technote.az “Engadget” platformasına istinadən bildirir ki, X platforması yaxın həftələrdə “Starterpacks” adlı yeni funksiyanı bütün istifadəçilərə təqdim etməyə hazırlaşır. Şirkətin məhsul rəhbəri Nikita Bier-in açıqlamasına görə, bu funksiya yeni istifadəçilərin maraqlarına uyğun hesabları tez tapıb izləməsinə kömək edən hazır siyahılardan ibarətdir.

    Bu xüsusiyyət, əslində, ilk dəfə 2024-cü ildə Bluesky tərəfindən təqdim edilən və eyni adla tanınan funksiyanın klonudur. Bluesky-da adi istifadəçilər maksimum 50 hesabdan ibarət öz “starter pack” siyahılarını yarada və onları paylaşa bilirdilər. Hətta QR kod vasitəsilə yeni istifadəçilərlə bölüşmək mümkün idi.

    X isə fərqli yanaşma seçib: platforma bu siyahıları istifadəçilərə buraxmaq əvəzinə, onları mərkəzləşdirilmiş şəkildə özü tərtib edir. Bier bildirib ki, X komandası “dünyanın hər yerində, hər sahədə ən yaxşı paylaşımları edən hesabları” seçərək yeni istifadəçilər üçün maraq kateqoriyalarına uyğun paketlər yaradıb.