YouTube axtarış sistemini yeniləyir

    Technote.az “The Verge” platformasına istinadən bildirir ki, YouTube axtarış sistemində bir sıra yeniliklər edir. Platforma artıq istifadəçilərə axtarış nəticələrində yalnız Shorts və ya yalnız uzun formatlı videoları görmək imkanı yaradacaq. İndiyə qədər filtrsiz axtarış zamanı qısa və uzun videolar qarışıq şəkildə göstərilirdi ki, bu da konkret format axtaran istifadəçilər üçün narahatlıq yaradırdı.

     Yeni axtarış filtrlərində “Videos” seçimi yalnız uzun formatlı videoları, “Shorts” seçimi isə yalnız qısa videoları göstərəcək. Bu dəyişiklik istifadəçilərin istədikləri məzmuna daha sürətli çatmasını hədəfləyir. Bununla yanaşı, YouTube bəzi köhnə filtrləri ləğv edir. “Upload Date – Last Hour” və “Sort by Rating” filtrləri istifadəçi şikayətləri səbəbilə silinir. Platforma tarixə görə digər filtrləri saxlamaqda davam edəcək.

     “View count” əsasında sıralama isə artıq “Popularity” filtri ilə əvəzlənir. YouTube bildirir ki, bu filtr videonun populyarlığını yalnız baxış sayına görə deyil, izləmə müddəti və digər uyğunluq siqnalları əsasında müəyyənləşdirir. Eyni zamanda, axtarışdakı “Sort By” menyusunun adı “Prioritize” olaraq dəyişdirilib.