Apple Siri-ni Google Gemini və Nvidia Blackwell üzərində yenidən qurdu

    Apple WWDC 2026 tədbirində süni intellekt strategiyasında mühüm dəyişiklik etdiyini açıqlayıb. Şirkət Siri səsli köməkçisinin yeni versiyasını Google-un Gemini texnologiyası əsasında hazırlanmış xüsusi model üzərində qurduğunu və bunun üçün Nvidia Blackwell B200 qrafik prosessorlarından istifadə etdiyini bildirib. Apple-ın təqdim etdiyi yeni arxitektura istifadəçi sorğularını mürəkkəbliyindən asılı olaraq üç fərqli səviyyədə emal edir. Sadə tapşırıqlar birbaşa cihazın üzərində işləyən Apple modelləri tərəfindən yerinə yetirilir. Daha mürəkkəb sorğular Apple-ın Private Cloud Compute infrastrukturu vasitəsilə emal olunur. Ən yüksək hesablama gücü tələb edən tapşırıqlar isə Google Cloud üzərində çalışan Nvidia Blackwell sistemlərinə yönləndirilir.

    Şirkətin proqram təminatı üzrə rəhbəri Kreyq Federiqi bildirib ki, istifadəçi sorğuları anonimləşdirilir və xüsusi tokenləşdirilmə üsulu ilə emal olunur. Onun sözlərinə görə, nə Apple əməkdaşları, nə də Google istifadəçilərin sorğularını konkret şəxslərlə əlaqələndirə bilirlər. Apple həmçinin vurğulayır ki, Google bu məlumatlardan gələcək süni intellekt modellərinin təlimində istifadə edə bilməyəcək. Məlumata görə, Nvidia-nın “Confidential Computing” texnologiyası məlumatları emal prosesi zamanı da şifrələyir və bununla əlavə təhlükəsizlik səviyyəsi yaradır. Bununla belə, Google Cloud qatının müstəqil audit nəticələri hələ də ictimaiyyətə açıqlanmayıb.

    WWDC 2026 çərçivəsində Apple həmçinin Apple Foundation Models (AFM) adlı yeni süni intellekt ailəsini təqdim edib. Bu ailəyə AFM Core, Core Advanced, Cloud, Cloud Pro və Cloud Image modelləri daxildir. Şirkətin iddiasına görə, ən güclü model olan AFM Cloud Pro performans baxımından Google-un qabaqcıl Gemini modellərinə yaxın nəticələr göstərir. Yeni Siri artıq əvvəlki illərdəki klassik səsli köməkçi konsepsiyasından uzaqlaşaraq daha çox danışıq qabiliyyətinə malik süni intellekt çatbotu kimi fəaliyyət göstərəcək. Apple rəhbərliyi bildirir ki, Siri ayrıca çatbot deyil, istifadəçilərin gündəlik fəaliyyətinə inteqrasiya olunmuş və təbii ünsiyyət qura bilən rəqəmsal köməkçidir. Apple-ın yeni süni intellekt funksiyalarının bu ilin sentyabr ayında istifadəyə verilməsi planlaşdırılır.