Apple Siri-ni gücləndirmək üçün Google serverlərindən istifadə edə bilər

    Technote.az “The Verge” platformasına istinadən bildirir ki, Apple yeni nəsil, süni intellektlə gücləndirilmiş Siri versiyası üçün Google serverlərindən istifadə etməyi nəzərdən keçirir. The Information nəşrinin yaydığı məlumata görə, Apple Google-dan məxfilik tələblərinə cavab verən və Gemini əsaslı Siri üçün xüsusi server infrastrukturunun qurulmasını araşdırmağı xahiş edib.

    Apple artıq yanvar ayında bildirmişdi ki, gecikdirilmiş yeni Siri versiyası Google-un Gemini süni intellekt modelləri ilə işləyəcək. Şirkətin rəsmi açıqlamasında qeyd olunmuşdu ki, “Apple Foundation Models”in növbəti nəsli Gemini modelləri və Google-un bulud texnologiyası əsasında qurulacaq. Bu modellərin gələcək “Apple Intelligence” funksiyalarını, o cümlədən daha fərdiləşdirilmiş Siri-ni dəstəkləyəcəyi vurğulanmışdı.

    Bununla belə, Apple əvvəlki açıqlamalarında “Apple Intelligence” funksiyalarının əsasən cihaz üzərində və “Private Cloud Compute” infrastrukturu vasitəsilə işləyəcəyini bildirmişdi. Yeni məlumatlar isə göstərir ki, şirkət Siri-ni daha sürətli inkişaf etdirmək üçün Google-un bulud imkanlarından daha geniş şəkildə yararlana bilər. Hesabatda həmçinin Apple-ın illərdir davam edən məlumat mərkəzi və bulud infrastrukturu strategiyasına da toxunulur. Qeyd olunur ki, Apple bu sahədə Google, Microsoft və Amazon kimi rəqiblərlə müqayisədə daha ehtiyatlı investisiya siyasəti yürüdüb. Halbuki adıçəkilən şirkətlər süni intellektə artan tələbatı qarşılamaq üçün milyardlarla dollar sərmayə yatırırlar.