Britaniyalı IT rəhbərlərinin 53%-i AI proqramının qayda pozduğunu deyib

    Böyük Britaniyada informasiya texnologiyalarına cavabdeh rəhbərlərin 53%-i ən azı 1 süni intellekt (AI) agentinin şirkət qaydalarını pozduğunu deyib. Bu pozuntular biznesə və ya müştərilərə təsir göstərib. AI agenti verilən tapşırıqları müəyyən qədər müstəqil yerinə yetirən proqramdır. Digər ölkələrdə orta göstərici isə cəmi 31% olub. Böyük fərq Britaniyada AI sistemlərinə nəzarətlə bağlı problemləri göstərir.

    “Harris Poll” araşdırmanı “Dataiku” üçün keçirib. Sorğu Böyük Britaniya, Fransa, Almaniya, ABŞ, BƏƏ, Yaponiya, Cənubi Koreya və Sinqapurda çalışan 685 CIO-nu əhatə edib. CIO şirkətin informasiya texnologiyalarına cavabdeh baş rəhbəridir. Britaniyalı iştirakçıların yalnız 49%-i AI sisteminin qərarlarını izah edən yoxlama qeydlərini göstərə biləcəyini deyib. 68%-ə görə, nəzarətdən çıxan agenti aşkar etmək və təsirini məhdudlaşdırmaq 24 saatdan çox çəkə bilər.

    Britaniyalı informasiya rəhbərlərinin 87%-i əsas problem kimi iş yerlərində xüsusi AI agentlərinin sürətlə çoxalmasını göstərib. “Dataiku” bu vəziyyəti “AI agent sprawl” adlandırır. Belə agentlər nəzarət qaydaları hazırlanmadan işə salınır. Nəticədə həm şirkətin işi, həm də müştərilər üçün əlavə risklər yarana bilər.

    Araşdırmaya görə, AI yatırımlarından nəticə gözləyən rəhbərlər ciddi təzyiq altındadır. Hədəflərə çatmasalar, iştirakçıların əksəriyyəti büdcənin azaldıla və iş yerlərinin ixtisar oluna biləcəyini düşünür. Şirkətlər agentlərin işini izləsə də, problem yarananda məsul şəxsi müəyyənləşdirməkdə çətinlik çəkir.

    “Dataiku” rəhbərlərinə görə, sərbəst işləyən sistemləri yalnız izləmək kifayət deyil. Onları daim nəzarətdə saxlamaq və idarə etmək lazımdır. Agent qaydanı pozarsa, məsuliyyətin kimdə olacağı sistem işə salınmazdan əvvəl müəyyən edilməlidir. Nəzarəti problem baş verəndən sonra əlavə etmək yetərli sayılmır. Əks halda şirkətin yeganə çıxış yolu agenti dayandırmaq və nəticələrin daha da ağırlaşmayacağına ümid etməkdir.