Google internet olmadan səsi mətnə çevirən Mac tətbiqini təqdim etdi

    “Google” görüşlərdəki danışığı və audiofaylları internet olmadan mətnə çevirən “Google AI Edge Foresight” tətbiqini çıxarıb. Pulsuz eksperimental qeyd tətbiqi hazırda “macOS” sistemində işləyir. Məlumatlar cihazın özündə emal olunur. Buna görə internet olmayan yerdə də görüş qeydlərindən yararlanmaq olur. Tətbiq əsasən “Apple Silicon” çipli “Mac”lar üçün uyğunlaşdırılıb.

    “Google AI Edge Foresight” səsi emal etmək üçün 740 milyon parametrli “EmbeddingGemma 2” modelindən istifadə edir. Tətbiq müxtəlif proqramlardakı onlayn görüşlərlə yanaşı, üzbəüz görüşlərin səsini də yaza bilir. “Google”a görə, fayllar, görüş səsləri və qeydlər kompüteri tərk etmir, yəni bulud xidmətinə göndərilmir.

    Tətbiqin ekranı 2 hissəyə bölünüb. İstifadəçi bir tərəfdə görüş zamanı qısa qeydlər yaza, digər tərəfdə süni intellektin danışıqdan hazırladığı mətni görə bilər. Sistem stenoqramdakı məlumatlara əsaslanaraq yarımçıq qeydləri daha səliqəli mətnə çevirir və görüşün xülasəsini hazırlayır. Danışığın tam mətninə ayrıca baxmaq da olur.

    Tətbiqdə “Gemma 4” modeli ilə işləyən daxili köməkçi də var. İstifadəçi görüşdə danışılanlar barədə ona sual verib cavab ala bilər. Kompüterdəki sənədləri də köməkçiyə qoşmaq olur. Köməkçi cavab hazırlayarkən həmin fayllardakı məlumatlardan yararlanır. Müzakirə sənəddəki mövzuya keçəndə sistem uyğun məlumatı dərhal tapa bilir.

    Bilik bazasına PDF, “Google Docs” və “Microsoft Office” sənədləri əlavə etmək olur. Adi mətn, “Markdown” faylları və veb əlfəcinlər də dəstəklənir. Eyni komanda aprel ayında cihazdakı modellərlə işləyən, süni intellekt əsaslı diktə aləti də çıxarmışdı. “Google” yeni layihəni də eksperimental tətbiq kimi göstərir.