Microsoft oyunlarda AI strategiyasını gücləndirir

    Technote.az “TechCrunch” platformasına istinadən bildirir ki, Microsoft oyun bölməsində ciddi rəhbərlik dəyişikliyi edib. Şirkətin Microsoft Gaming üzrə uzun illər rəhbəri olmuş Phil Spencer və Xbox prezidenti Sarah Bond vəzifələrini tərk ediblər.

    Phil Spencer-in yerinə əvvəllər Instacart və Meta-da çalışmış, son olaraq isə Microsoft-un CoreAI məhsullarına rəhbərlik etmiş Asha Sharma təyin olunub. Bu dəyişiklik Microsoft-un oyun sahəsində süni intellektə daha güclü fokuslanacağını göstərir. Şirkət artıq bir müddətdir oyunlarla AI-ı birləşdirmək istiqamətində təcrübələr aparır. Məsələn, AI əsaslı oyun köməkçisi üzərində iş aparılıb, həmçinin “Quake II” oyununun süni intellekt tərəfindən yaradılmış, lakin problemlərlə müşayiət olunan bir səviyyəsi təqdim olunub.

    The Verge tərəfindən yayımlanan daxili məktubda Asha Sharma bildirib ki, Microsoft “oynamağın yeni yollarını və yeni biznes modellərini ixtira edəcək”. Onun sözlərinə görə, gələcəkdə monetizasiya və süni intellekt oyun sənayesinə ciddi təsir göstərəcək. Bununla yanaşı, Sharma şirkətin “qısamüddətli effektivlik dalınca qaçmayacağını” və oyun ekosistemini “ruhsuz AI ilə yaradılmış məzmunla doldurmayacağını” xüsusi vurğulayıb.