Mozilla gəlir modelini yenidən qurmaq istəyir

    Technote.az “The Verge” platformasına istinadən bildirir ki, Mozilla yeni CEO-su ilə Firefox-un gələcəyini daha açıq şəkildə “AI mərkəzli” qurmağa hazırlaşır. Şirkətin "for-profit" qoluna rəhbərlik edəcək yeni icraçı direktor Anthony Enzor-DeMeo deyir ki, AI dövründə insanlara etibar edilə bilən texnologiya şirkəti daha çox lazımdır və Mozilla bu boşluğu doldura bilər. Enzor-DeMeo-nun planına görə, Mozilla yaxın zamanda öz nəhəng dil modelini (LLM) sıfırdan yaratmayacaq. Bunun əvəzinə, Firefox-a gələn il “AI Mode” adlı yeni rejim əlavə olunacaq və istifadəçilərə müxtəlif AI modellərindən seçim etmək imkanı veriləcək: həm açıq mənbəli modellər, həm də “Mozilla-nın öz buludunda” host edilən daha özəl seçimlər.

    Yeni CEO vurğulayır ki, Mozilla üçün “prioritet 1” yenə də ən yaxşı brauzeri qurmaqdır və yeni məhsulların çoxu Firefox-la daha sıx inteqrasiya olunacaq. Məsələn, Mozilla VPN-in gələn il Firefox-a birbaşa daxil edilməsi planlaşdırılır. Digər tərəfdən, Mozilla-nın biznes tərəfi də gündəmdədir. Şirkət Google-un Firefox-da “default search” razılaşmasından gələn gəlirdən asılılığı azaltmaq istəyir, amma bunu brauzerdən uzaqlaşmadan abunəlik, reklam və mümkün yeni axtarış və AI tərəfdaşlıqları ilə etməyi düşünür.