Nielsen: Süni intellekt işçilərin qiymətləndirilməsini çətinləşdirir

    Şirkətlərin əməkdaşlara verdiyi süni intellekt alətləri işi sürətləndirsə də, menecerlər üçün yeni çətinliklər yaradır. “Nielsen” 7 ölkədə sorğu keçirib. Araşdırmaya 1700 direktor və yüksək səviyyəli menecer qatılıb. Rəhbərlərin yarıdan çoxu süni intellekt tətbiq olunandan sonra işçilərin gördüyü işi qiymətləndirməyin çətinləşdiyini deyib. Çünki hazır nəticəyə baxan menecer işin hansı hissəsini əməkdaşın, hansı hissəsini süni intellektin gördüyünü ayırd edə bilmir.

    Buna baxmayaraq, rəhbərlərin 94%-i süni intellektlə iş proseslərini yaxşılaşdırmağa müsbət yanaşır. Menecerlərin təxminən yarısı komandaların hazırladığı materialları yoxlamağa və düzəliş etməyə əvvəlkindən daha çox vaxt ayırır. Problem süni intellekt alətlərinin zəif işləməsi deyil. Şirkətlərin daxili qaydaları texnologiya qədər sürətlə dəyişmir. Nəticədə əməkdaşın işini sürətləndirən alətlər menecerlərin yükünü artıra bilir.

    Sorğuya qatılanların 78%-i süni intellekt tətbiq olunandan sonra əməkdaşları qiymətləndirmə üsulunu dəyişib. İndi süni intellekt üçün düzgün sorğu yazmaq, hansı tapşırığı ona verməyi seçmək və yeni iş üsullarını sınamaq daha vacib bacarıqlar sayılır. Menecerlərin 46%-i qərar verərkən süni intellektdən kömək alır. Rəhbərlərin 39%-i əməkdaşların işi ilə bağlı qiymətləndirmə mətnlərini də bu texnologiya ilə hazırlayır.

    Süni intellektin əməkdaşların qiymətləndirilməsində işlədilməsi qərəz riskini artırır. Böyük dil modelləri, yəni əvvəlki məlumatlara əsaslanaraq mətn yaradan sistemlər, öyrədildiyi məlumatlardakı insan qərəzlərini təkrarlaya bilər. 2025-ci ilin əvvəlində dərc olunan araşdırma göstərib ki, süni intellekt modelləri qaradərili kişi namizədlərə qarşı qərəzli davrana bilir. Şirkətlərdə bu risklərlə bağlı aydın qaydalar hələ formalaşmayıb.

    Süni intellektin tətbiqi şirkətlərdə işlədilən proqramların sayını da azaltmayıb. Menecerlərin 57%-i təşkilatlarında əvvəlkindən daha çox alət işləndiyini deyib. Respondentlərin 51%-nə görə, proqramlar bir-birindən daha asılı vəziyyətə düşüb. Yalnız 29% süni intellekt üçün texniki sistemi tam qaydaya salınmış və vahid mərkəzdən idarə olunan hesab edir. İşçilərin şirkət tərəfindən təsdiqlənməmiş süni intellekt alətlərinə üz tutması nəzarəti daha da çətinləşdirir.

    Menecerlərin 58%-i növbəti 1 ildə insan əməkdaşlardan daha çox süni intellekt agentinə nəzarət edəcəyini gözləyir. Süni intellekt agentləri verilən tapşırıqları müəyyən qədər sərbəst yerinə yetirən sistemlərdir. Respondentlərin 46%-i onların hərəkətləri üzərində nəzarəti itirməkdən narahatdır. Daha 35% isə süni intellektin verdiyi qərarlara görə məsuliyyət daşımaqdan ehtiyat edir. Buna görə rəhbərlər vacib tapşırıqlarda bu agentlərin tam sərbəst deyil, insan nəzarəti altında işləməsini istəyirlər.