Nvidia DLSS 5-i təqdim etdi

    Technote.az “The Verge” platformasına istinadən bildirir ki, Nvidia GTC konfransında yeni nəsil qrafik texnologiyası DLSS 5-i təqdim edib. Şirkətin CEO-su Jensen Huang bu yeniliyi “qrafika üçün GPT anı” adlandıraraq bildirib ki, texnologiya əl ilə hazırlanmış render üsullarını generativ süni intellektlə birləşdirərək vizual realizmdə böyük sıçrayış yaradır.

    Əvvəlki DLSS versiyaları əsasən aşağı qrafik keyfiyyətini süni intellekt vasitəsilə yüksəldirdisə, DLSS 5 artıq görüntünü sadəcə yaxşılaşdırmır, onu yenidən yaradır. Sistem səhnəni analiz edərək işıqlandırma, material teksturaları və vizual detalları real vaxtda generativ AI ilə dəyişdirə bilir. Nvidia-nın nümayiş etdirdiyi nümunələrdə, o cümlədən Resident Evil Requiem, Starfield, Hogwarts Legacy və EA Sports FC DLSS 5 oyunun vizual elementlərinə nəzərəçarpacaq dəyişikliklər tətbiq edir.

    AI modeli yalnız bir kadrı analiz edərək saç, parça, dəri teksturası və işıq mühitini anlayır, sonra isə daha realist görünüş yaratmaq üçün yeni detallar generasiya edir. Məsələn:
    •    dəri üzərində işığın yayılması (subsurface scattering),
    •    parça səthində parıltı effektləri,
    •    saç və materialların işıqla qarşılıqlı təsiri.

     Bununla belə, bəzi nümunələrdə personajların görünüşünün dəyişməsi mübahisə yaradıb. Bəzi istifadəçilər bunu sosial media filtrlərinə bənzədərək obrazların orijinal dizaynından uzaqlaşdığını deyir. DLSS 5-in bu ilin payızında istifadəyə verilməsi planlaşdırılır. İlk mərhələdə texnologiya məhdud sayda oyunlarda aktiv olacaq. Siyahıya həmçinin The Elder Scrolls VI: Oblivion remake və Assassin’s Creed Shadows kimi böyük layihələr də daxildir.