OpenAI-ın hesabatları investorları narahat etməyə başlayıb

    OpenAI IPO-ya hazırlaşdığı bir vaxtda şirkətin maliyyə vəziyyəti investorların diqqətini çəkib. İlk baxışda şirkət klassik proqram təminatı istehsalçısı kimi görünür: balansında borc yoxdur, lizinq öhdəlikləri isə 750 milyon dollardan azdır. Lakin görünən mənzərənin arxasında yüzmilyardlarla dollarlıq uzunmüddətli öhdəliklər dayanır. OpenAI-nin 2026-cı ilin 31 mart tarixinə olan hesabatlarında təxminən 665 milyard dollarlıq satınalma və xidmət öhdəlikləri balansdan kənarda saxlanılır. Bu məbləğin böyük hissəsi süni intellekt modellərinin işlədilməsi üçün tələb olunan məlumat mərkəzləri, serverlər və çiplərin uzunmüddətli icarəsinə aiddir.

    Şirkət bu infrastrukturun böyük hissəsini özündə saxlamır. Əvəzində OpenAI, Microsoft, Oracle, Amazon və Stargate, Fluidstack kimi tərəfdaşlardan hesablama gücü icarəyə götürür. Nəticədə bu müqavilələr ənənəvi borc kimi balansda görünməsə də, şirkətin gələcək maliyyə öhdəlikləri olaraq qalır.

    Maliyyə hesabatlarında diqqət çəkən digər məqam OpenAI-nin gəlirlərinin formalaşmasında əlaqəli tərəflərin böyük paya sahib olmasıdır. Şirkətin satış xərclərinin təxminən 72 faizi Microsoft kimi əlaqəli tərəflərə ödənilir. Microsoft həm OpenAI-nin əsas investorlarından biri, həm də ən böyük infrastruktur təminatçılarından biridir. Bu isə mümkün maraq toqquşmaları ilə bağlı suallar yaradır və IPO prosesi zamanı tənzimləyici qurumların diqqət mərkəzində ola bilər.

    Bununla yanaşı, OpenAI-nin gələcək proqnozları da müzakirələrə səbəb olur. Şirkət reklam gəlirlərinin 2026-cı ildəki 2,4 milyard dollardan 2030-cu ildə 102 milyard dollara yüksələcəyini gözləyir. Bu isə bazar araşdırmalarına görə həmin dövrdə bütün süni intellekt axtarış və chatbot reklam bazarının ümumi həcminə yaxın rəqəmdir.