Scout Motors zavod işçilərini AI dəstəkli qulaqlıqla hazırlayır
Süni İntellekt
19.11.2026
“Scout Motors” Cənubi Karolina ştatının Blythewood şəhərində tikilən zavodunda işçiləri hazırlamaq üçün süni intellekt (AI) dəstəkli qulaqlıqdan yararlanır. Qulaqlıqdakı köməkçi işi addım-addım izah edir və göstərişləri işçinin tempinə uyğun dəyişir. Şirkət istəyir ki, yeni əməkdaşlar dərs otağında təlimat oxumaq əvəzinə ilk gündən praktiki təcrübə qazansınlar. Toplanan məlumatlar işə qəbul, təlim və vəzifə bölgüsünü yaxşılaşdırmaq üçün yenidən AI modelinə göndərilir.
Şirkət bu yanaşmanı tapşırıq əsaslı təlim adlandırır və istehsal prosesini əsas bacarıqlara bölür. Sadə nümunədə işçi 12 qutudan 12 detal götürür, ardıcıllığın düzgün olduğunu təsdiqləyir və qüsurları yoxlayır. Qulaqlıqdakı AI iş görülərkən bütün addımları izah edir. İşçi eyni prosesi təxminən 15 dəfə təkrarlayır, hər cəhddə sürətini və dəqiqliyini artırdıqdan sonra növbəti bacarığa keçir.
AI sistemi təlim başlamazdan əvvəl namizədin əvvəlki iş təcrübəsini araşdırır və ona uyğun sahəni müəyyənləşdirir. Məsələn, forklift sürücüsü logistika bölməsinə, rəngləmə təcrübəsi olan şəxs boya sexinə yönləndirilə bilər. Məqsəd mütəxəssisin nəzərindən qaça biləcək bacarıqları üzə çıxarmaq və daha əvvəl avtomobil istehsalında çalışmayan yerli namizədlərə də şans verməkdir. “Scout Motors” zavod tam güclə işləyənədək, yəni 2028-ci ilədək 4000-dən çox işçi götürməyi planlaşdırır.
Təlim materialı hər işçinin dil biliyinə, texniki hazırlığına və öyrənmə sürətinə uyğun dəyişir. Beləcə, eyni mövzunu 10 nəfərə 10 gün ərzində izah etmək əvəzinə hər işçiyə fərdi göstəriş verilir. Sistem qrupların tapşırıqlara necə reaksiya verdiyini öyrənir və sonrakı işçilər üçün təlimi yeniləyir. Şirkət hər yeni qrupun əvvəlkindən 1% daha yaxşı nəticə göstərəcəyini düşünür. Onun fikrincə, 1000 təkrardan sonra AI köməkçisi xeyli dəqiqləşəcək.
“Scout Motors” növbəti mərhələdə görüntünü tanıyan AI və artırılmış reallıq eynəkləri ilə təlimi sınaqdan keçirməyi düşünür. Şirkət texnologiyanı təlim otağından zavod və servis mərkəzlərinə də aparmaq istəyir. Sistemə müxtəlif ölkə və sahələrə aid, onilliklər ərzində hazırlanmış avadanlıq təlimatları və istehsal sənədləri əlavə olunur. Bununla işçi qalın qovluqlarda və PDF fayllarında axtarış etmədən lazım olan məlumatı qulaqlıqdan dərhal ala bilər.
Şirkət gələcəkdə bu köməkçini avtomobil sahiblərinin istifadəsinə də açmaq istəyir. Sistem evdə aksesuar quraşdırarkən və ya gündəlik texniki qulluq zamanı addım-addım göstəriş verə bilər. Bununla yanaşı, istehsalda AI-dan yararlanmaq iş yerlərinin azalacağı ilə bağlı narahatlıqları da artırır. “Scout Motors” rəhbərliyi bu məsələyə birbaşa münasibət açıqlamayıb. Şirkət əsas üstünlük kimi yeni əməkdaşların daha qısa müddətdə məhsuldar işləməyə başlamasını göstərib.
Şərhlər
Şərh yazmaq üçün Google və ya Facebook hesabınızla daxil olun.
Şərhlər yüklənir...
Ən çox oxunanlar