YouTube Music musiqi axtarışı və podkastlar üçün 2 AI yeniliyi təqdim etdi

    “YouTube” çərşənbə günü keçirilən “Made on YouTube” tədbirində “YouTube Music” üçün 2 yeni süni intellekt funksiyasını açıqlayıb. Yenilənmiş “Ask Music” musiqi və ifaçılar barədə gündəlik dildə verilən sualları cavablandıracaq. “Your Podcast Lineup” isə yeni podkastlar tapmağı asanlaşdıracaq. Hər iki funksiya tezliklə dünya üzrə “YouTube Music” və “YouTube Premium” abunəçilərinə açılacaq.

    “Ask Music” indiyədək əsasən dinləyicinin əhvalına uyğun fərdi musiqi siyahıları hazırlamaq və mahnı tapmaq üçün işlədilirdi. Yenilikdən sonra istifadəçi nə dinləmək istədiyini adi danışıq dilində yaza biləcək. Sistem də buna uyğun fərdi dinləmə növbəsi yaradacaq. Funksiya rəsmi yazılar, remikslər, canlı ifalar, kaverlər və DJ setlərinin daxil olduğu 300 milyondan çox mahnıdan ibarət kataloq üzrə işləyəcək. Axtarış zamanı konkret mahnı və ya ifaçı adı yazmaq lazım gəlməyəcək.

    İstifadəçilər konkret mahnıya hansı əsər və albomların ilham verdiyini, həmçinin onun yaranma tarixçəsini soruşa biləcəklər. “Ask Music” mahnıda bas gitara ifaçısını öyrənməyə və sonra həmin musiqiçinin qatıldığı başqa əsərləri tapmağa kömək edəcək. Alət müəyyən mahnıdan nümunə götürülərək hazırlanan digər mahnıları da axtaracaq. Sevilən ifaçının qatıldığı podkastları və onların ayrı-ayrı buraxılışlarını tapmaq da olacaq.

    “Your Podcast Lineup” “YouTube Music” tətbiqinin podkast səhifəsində görünəcək. Funksiya hər həftə istifadəçi üçün fərdi səsli xülasə hazırlayacaq. Süni intellekt maraqlara uyğun verilişləri qısa şəkildə tanıdacaq və onların niyə maraqlı ola biləcəyini izah edəcək. Xülasədən sonra tövsiyə olunan podkast buraxılışına birbaşa keçmək olacaq.

    “YouTube” daha əvvəl “YouTube Music” daxilində dinlənilən mahnılar haqqında hekayələr, pərəstişkar məlumatları və şərhlər danışan süni intellekt aparıcılarını sınaqdan keçirmişdi. Yeni funksiyalar bu yanaşmanı musiqi axtarışına və podkast tövsiyələrinə də gətirir. “Spotify” da oxşar fərdi podkast funksiyası çıxarıb. Həmin sistem istifadəçinin maraq və sorğularına əsasən süni intellektlə podkast buraxılışları hazırlayır.