ABŞ Nvidia-nın Hugging Face AI platformasını almasını araşdırır

    ABŞ Ədliyyə Nazirliyi “Nvidia”nın “Hugging Face” platformasını almaq planının süni intellekt bazarındakı rəqabətə necə təsir edəcəyini araşdırır. Şirkət sentyabrda bu alış üçün təxminən 13 milyard dollar (təxminən 22,1 milyard manat) ödəməyə razılaşıb. Nazirlik sövdələşmənin rəqiblərə və müştərilərə təsiri ilə bağlı suallar verib. Hələlik rəsmi ittiham irəli sürülməyib və alışın dayandırılması barədə qərar çıxarılmayıb.

    “Hugging Face” açıq mənbəli platformadır. Burada yeni süni intellekt modellərini yerləşdirmək və sınaqdan keçirmək olur. Platforma süni intellekt sistemləri üçün infrastruktur da satır və müxtəlif istehsalçıların çipləri ilə işləyir. Nazirliyin əsas narahatlığı bu mühüm yayım kanalının “Nvidia”nın nəzarətinə keçməsidir. Belə olarsa, rəqiblərin platformaya çıxışı çətinləşə, “Nvidia” da öz məhsullarına üstünlük verə bilər.

    “Nvidia” alış başa çatdıqdan sonra “Hugging Face” platformasında müxtəlif çip istehsalçılarını və süni intellekt xidmətlərini dəstəkləməyə davam edəcəyini açıqlayıb. Platformanın müstəqil şirkətlərə açıq qalıb-qalmayacağı araşdırmanın əsas mövzularındandır. Razılaşma plana uyğun getsə, “Hugging Face” 2027-ci ilin ilk yarısında rəsmən “Nvidia”nın tərkibinə keçəcək. Nazirliyin araşdırmasının bu tarixə təsir edib-etməyəcəyi hələ bilinmir.

    Bu, “Nvidia”nın ABŞ-də üzləşdiyi ilk rəqabət araşdırması deyil. Ədliyyə Nazirliyi superkompüterləri idarə etmək üçün proqram hazırlayan və milli təhlükəsizlik sahəsi ilə əlaqələri olan “SchedMD” şirkətinin alınmasını da yoxlayıb. “Nvidia” həmin proqramı dəstəkləməyə davam edəcəyinə söz verib. Bu məsələ şirkətlə bağlı 3 illik daha geniş araşdırmanın bir hissəsinə çevrilib.

    Rəsmilər “Nvidia”nın şəbəkə avadanlığı və “Groq” çipləri alan müştərilərə daha çox süni intellekt çipi ayırıb-ayırmadığını da araşdırıblar. “Nvidia” 2025-ci ilin dekabrında “Groq” şirkətini 20 milyard dollara (təxminən 34 milyard manat) alıb. Sövdələşməyə yeni şirkətin baş direktoru da daxil olmaqla əsas əməkdaşlar daxil olub. Şirkətin süni intellekt avadanlıqlarının Çin, İran, Şimali Koreya və Rusiyaya satışına da məhdudiyyət qoyulub.