Nvidia Simplismart AI startapına sərmayə qoydu, dəyəri 170 milyon manatdır

    “Nvidia” Hindistanın “Simplismart” startapına 14 milyon dollar (təxminən 23,8 milyon manat) sərmayə qoyulan B seriyalı maliyyələşmə mərhələsinə qoşulub. İnvestisiyaya “Dallas Venture Capital” rəhbərlik edib. “Accel”, “Shastra VC” və “Micromax” da sərmayəçilər arasındadır. Bununla 4 ildir işləyən startapın dəyəri təxminən 100 milyon dollara (170 milyon manat) çatıb.

    “Simplismart” proqramı süni intellekt (AI) modeli ilə onu işlədən hesablama sistemi arasında əlaqə yaradır və ayarları avtomatik tənzimləyir. Sistem cavab sürətini, emal olunan sorğuların sayını və sərf edilən hesablama gücünü müştərinin ehtiyacına uyğunlaşdırır. Beləliklə, şirkətlər hazırkı GPU-lardan, yəni qrafik prosessorlardan daha səmərəli yararlana bilirlər. Bəzi hallarda işi daha az GPU ilə görmək də olur.

    Müştərilər AI modellərini “Simplismart” platformasında, işlətdikləri bulud xidmətində və ya öz serverlərində aça bilirlər. Proqramda modelləri dəqiq tənzimləmək, tələbat artanda hesablama gücünü avtomatik yüksəltmək və iş göstəricilərini izləmək üçün alətlər var. Bulud xidməti göstərən şirkətlər də onun köməyi ilə AI modellərini işlədən öz xidmətlərini qura bilirlər.

    “Simplismart” “InVideo” platformasının GPU xərclərini 56% azaltmağa kömək edib. Startap “HeyGen”, “Higgsfield” və “Ema” kimi AI şirkətləri ilə də işləyir. “Yotta” bu texnologiyadan “Shakti Studio” platformasında yararlanır. Bunun sayəsində şirkət serverləri ayrıca idarə etmədən AI modellərini işlədən xidmət qurub.

    Startapın açıqlamasına görə, son istifadə göstəriciləri əsasında hesablanan illik gəlir tempi son 6 ayda 14 dəfə artıb və 8 rəqəmli məbləğə çatıb. Dəqiq rəqəm açıqlanmayıb. Bu hesablamaya infrastruktur tərəfdaşlarına ötürülən gəlir daxil deyil. Müştərilərin çoxu Hindistanda olsa da, gəlirin yarıdan çoxu ABŞ bazarından gəlir. “Nvidia” həmçinin “Dynamo” proqramının sistemə qoşulması üzərində startapla işləyir və onu potensial tərəfdaşlarla tanış edir.

    “Simplismart” bu sahədə “Nvidia”nın öz həlləri, həmçinin “Amazon Web Services”, “Google Cloud” və “Microsoft Azure” ilə rəqabət aparır. Startap hamı üçün eyni hazır variantı seçmək əvəzinə sürət, xərc və performans arasında hər müştəriyə uyğun tarazlıq qurmağa çalışır. Əsas hədəfi yüksək performans istəyən, amma büdcəsi məhdud olan müştərilərdir.

    “Simplismart” 2022-ci ildə “Oracle”ın keçmiş əməkdaşı Amritanshu Jain və əvvəllər “Google”da mühəndis işləyən Devansh Ghatak tərəfindən yaradılıb. Təsisçilər BITS Pilani universitetində oxuyarkən tanış olublar. Hazırda startapda 58 nəfər işləyir. Yeni sərmayə ABŞ bazarında işin genişləndirilməsinə, komandanın böyüdülməsinə və AI modellərini işlədən proqramın inkişafına xərclənəcək.