DataOne məlumat mərkəzi 62 generatora görə 1,07 milyon dollar cərimə aldı

    ABŞ-nin Nyu-Cersi ştatının Vineland şəhərində tikilən “DataOne” məlumat mərkəzi rekord məbləğdə - 1,07 milyon dollar (təxminən 1,82 milyon manat) cərimələnib. Ştat müfəttişləri iyulun sonunda tikinti sahəsinə elektrik verən 62 icazəsiz portativ generatorun işlədildiyini aşkarlayıblar. Obyektə generatorlar üçün icazə almaq və ya onları dayandırmaq üçün 45 gün vaxt verilib.

    Vineland sakinləri generatorların səsindən hələ fevralda keçirilən şəhər toplantısında şikayət etmişdilər. Müfəttişlər ötən ilin dekabrında əraziyə ilk dəfə baxarkən generator görmədiklərini deyiblər. Sakinlərin sözlərinə görə, peyk görüntülərində fevraldan başlayaraq ərazidə hansısa enerji qurğusu görünür. Məsələ də bu görüntülərdən sonra icma toplantısına çıxarılıb.

    Şikayətlər təkcə generatorlarla bağlı deyil. Sakinlər təxminən 5,7 milyon litrlik mayeləşdirilmiş təbii qaz çəninin də icazəsiz tikildiyini deyirlər. Onların sözlərinə görə, tikinti sahəsindəki güclü səs xüsusən gecələr təxminən 800 metr uzaqdakı evlərə çatır. Sakinlər layihənin ictimaiyyətlə yetərincə müzakirə olunmadığını da vurğulayırlar.

    Sakinlər ərazilərində məlumat mərkəzinin tikildiyini “Microsoft” şirkətinin 33 milyard dollarlıq (təxminən 56,1 milyard manat) müqaviləsindən sonra öyrəndiklərini deyirlər. Müqavilə “Microsoft” ilə “Nebius” arasında bağlanıb. “Nebius” lazım olan hesablama gücünü almaq üçün “DataOne” ilə razılaşıb. İcma üzvləri milyardlarla dollarlıq layihə üçün bu cərimənin yetərincə çəkindirici olmadığını düşünürlər.

    “DataOne” cərimə ilə razı deyil və müvəqqəti generatorların havaya buraxdığı tullantılar üçün icazə almağa müraciət edəcəyini açıqlayıb. Şirkətin sözlərinə görə, səsli və havanı daha çox çirkləndirən portativ turbinlərin müasir yanacaq elementləri ilə dəyişdirilməsinə başlanıb. Ştatın qərarına görə, icazələr 45 gün ərzində alınmasa, generatorlar dayandırılmalıdır. Sakinlər hər generator üçün ayrıca cərimə yazılmasını istəyirlər.

    Oxşar mübahisə Memfis və Sautheven şəhərlərində də yaşanıb. “xAI” şirkəti “Colossus 2” məlumat mərkəzinə elektrik vermək üçün 69 icazəsiz generator quraşdırmışdı. Sakinlər havaya minlərlə ton çirkləndirici maddə buraxıldığını əsas gətirərək məhkəməyə müraciət etmişdilər. Ədliyyə Nazirliyi obyektin vacib əməliyyatlara xidmət etdiyini deyərək işin bağlanmasını istəyib. Şirkət turbinləri çıxarmağa razılaşıb. Ancaq 1,2 giqavat gücündə əvəzedici stansiyalar mərhələli şəkildə işə düşdüyü üçün prosesin 1 ildən çox çəkəcəyi açıqlanıb.