Google, OpenAI, xAI və Anthropic-in hər biri Pentaqondan 200 milyon dollarlıq müqavilə əldə edib

     ABŞ-da süni zəka sahəsində fəaliyyət göstərən dörd aparıcı şirkət ABŞ Müdafiə Nazirliyindən silahlı qüvvələrdə yeni texnologiyaların tətbiqini sürətləndirmək məqsədilə iri müqavilələr alıb. Seçilmiş podratçılar siyahısına Google, OpenAI, xAI və Anthropic daxildir və müvafiq müqavilələr artıq imzalanıb. Bu həftə ABŞ Müdafiə Nazirliyinin Rəqəmsal Texnologiyalar və Süni Zəka üzrə Baş İdarəsinin nümayəndələri bildiriblər ki, nazirlik süni zəka sahəsində fəaliyyət göstərən bu dörd böyük ABŞ şirkəti ilə müqavilələrin bağlanmasına 200 milyon dollara qədər vəsait ayıracaq. Bloomberg-in bu mövzu ilə bağlı xəbərində vurğulanır ki, 200 milyon dollar sadəcə hər bir podratçının xidmətləri üçün nəzərdə tutulan maksimal xərc limitidir və faktiki müqavilə məbləğləri bu göstəricidən aşağı ola bilər.

     Pentaqon süni zəka sistemlərinin kommersiya versiyalarını həm döyüş sahəsində, həm də kəşfiyyat və müxtəlif təsərrüfat fəaliyyətlərində istifadə etməyə hazırdır. Qeyd edək ki, bundan əvvəl Elon Musk ona məxsus xAI şirkətinin dövlət qurumlarının ehtiyacları üçün Grok adlı çat-botun xüsusi versiyasını hazırlayacağını bəyan etmişdi. ABŞ hökumətinin informasiya infrastrukturu daxilində bu cür həllərə çıxış imkanı digər əlaqədar qurumlara da veriləcək.

     Bu sistemlərin tətbiqinə isə Ümumi Xidmətlər İdarəsi (GSA) rəhbərlik edəcək. Qeyd etmək lazımdır ki, süni zəkanın ABŞ Müdafiə Nazirliyinin ehtiyaclarına uyğunlaşdırılması üçün seçilmiş dörd podratçıdan üçü bir-biri ilə müəyyən dərəcədə bağlıdır. Anthropic startapı OpenAI-nin sabiq inkişaf üzrə vitse-prezidenti Dario Amodei tərəfindən təsis olunub. Bundan əlavə, OpenAI-nin həmtəsisçilərindən biri olan John Schulman ona bu layihədə 5 ay boyunca dəstək verib. Elon Musk isə OpenAI-nin ilkin mərhələdə formalaşmasında iştirak edib. Lakin onun süni zəkanın inkişafı ilə bağlı baxışları Sam Altman-ın yanaşmasından fərqləndiyi üçün sonradan özünün xAI adlı startapını qurub.