Meta pornoqrafik materialları yaymaqda ittiham edilir

     Meta şirkəti yeni bir məhkəmə qalmaqalının mərkəzinə düşüb. Onu süni intellektini “böyüklər üçün” videolar yaratmağa öyrətmək məqsədilə pirat pornoqrafik kontentin yayılmasında ittiham edirlər. İddiaya əsasən, bu məqsədlə BitTorrent şəbəkəsindən istifadə olunub. İddianı qaldıran Strike 3 Holdings (S3H) şirkətidir. Meta isə bu ittihamları rədd edir və onları əsassız adlandırır. İddiaçı tərəf olan Strike 3 Holdings özünü “Hollywood səviyyəsində” pornofilmlər istehsal edən bir holdinq kimi təqdim edir. Şirkətin iddiasına görə, Meta 2018-ci ildən bəri BitTorrent peer-to-peer şəbəkəsində icazəsiz şəkildə böyüklər üçün nəzərdə tutulmuş ən azı 2396 ədəd film yayıb.

     BitTorrent-in təbiəti nəzərə alınaraq həmin videoları başqa şəxslər, o cümlədən yetkinlik yaşına çatmayanlar da yükləyə bilərdi. İddiada deyilir ki, Meta guya bu filmlərin ən məşhur olanlarını elə yayımlandığı gün “qəsdən seçir” və daha sonra həmin videolar həftələrlə, bəzən aylarla şəbəkədə əlçatan qalır. İddiaçılar həmçinin bildirirlər ki, Meta bu fəaliyyətini gizlətmək məqsədilə anonim IP ünvanlarına malik 6 virtual buluddan ibarət bütöv bir şəbəkə yaradıb. Bu ünvanların bir qismi Meta-nın daxili şəbəkələri ilə əlaqələndirilib, ən azı bir ünvan isə şirkət əməkdaşlarından birinin ev IP ünvanına bağlı olub. S3H hesab edir ki, bu hallar Meta-nın süni intellekt əsaslı pornoqrafik videolar generatoru yaratmağı planlaşdırdığını göstərə bilər.

     İddiada məhkəmədən Mark Zuckerberg-ə məxsus şirkətə bu cür kontentdən istifadəni qadağan etməsi və müəllif hüququ sahibinə kompensasiya ödənilməsi tələb olunur. Meta isə ittihamlara cavab olaraq bildirir ki, onun nə vaxtsa BitTorrent və ya digər peer-to-peer şəbəkələr vasitəsilə pirat kontent yaydığına dair heç bir sübut yoxdur. Şirkət əlavə edib ki, hazırda hüquqşünasları bu iddianı araşdırır. Qeyd edək ki, S3H-nin iddiası tamamilə yeni bir hal deyil: Meta daha əvvəl də süni intellekti öyrətmək üçün BitTorrent şəbəkəsi vasitəsilə yayımlanmış pirat kitab nüsxələrindən istifadə etdiyi iddiası ilə məhkəməyə verilib.