Meta şirkəti Apple-ın artıq 4-cü süni intellekt mütəxəssisini özünə cəlb edib

     Süni intellekt sahəsində dəyərli mütəxəssislər üçün ən fəal “ovçu” hazırda texnoloji nəhənglər arasında Meta Platforms şirkətidir. Son 1 ay ərzində Meta rəqib Apple şirkətindən artıq 4 aparıcı tədqiqatçını öz tərəfinə çəkə bilib və bu siyahıya yaxın günlərdə Bowen Zhang da əlavə olunub. Bloomberg-in məlumatına görə, Zhang Apple-da işlədiyi dövrdə multimodal dil modelləri üzərində çalışıb. O, artıq ötən cümə günü Apple-dan ayrılıb və yaxın vaxtlarda Meta Platforms-un süni intellekt üzrə inkişaf komandasında fəaliyyətə başlayacaq. O, daha əvvəl Apple-ın süni intellekt texnologiyalarına əsaslanan bütün platformalarının bazasında duran fundamental modellərin hazırlanmasında iştirak edib. Bloomberg-in bildirdiyinə görə, daha əvvəl Zhang-ın rəhbəri olmuş Ruoming Pang da Meta-ya keçib və bu qərara gəlməsində yeni işəgötürənin təqdim etdiyi 200 milyon dollarlıq stimullaşdırıcı ödəniş rol oynamış ola bilər.

     Apple-ın həmin komandasında çalışmış digər 2 mütəxəssis - Tom Gunter və Mark Lee - də artıq Meta-ya keçiblər. Apple-ın süni intellekt sahəsində fundamental həllər üzrə ixtisaslaşmış komandası Kaliforniya və Nyu-York arasında yerləşmiş şəkildə fəaliyyət göstərir. Apple süni intellekt bölməsində qalan əməkdaşların maaşını artırmalı olub, lakin rəqiblərdən gələn təkliflərlə rəqabət aparmağa hazır deyil. Əsas mütəxəssislərin gedişi Apple-ın süni intellekt sahəsində gələcək inkişaf istiqaməti ilə bağlı qeyri-müəyyənlik yaşamasına səbəb olub. Böyük ehtimalla şirkət bundan sonra üçüncü tərəf təminatçılarının modellərinə daha çox güvənməli olacaq. Apple rəhbərliyi süni intellekt sahəsində öz məhsullarının tezliklə uğur qazanacağına o qədər də inanmır və bu da mütəxəssislərin motivasiyasını daha da zəiflədir.

     Meta isə bu məsələdə səxavətli təklifləri ilə lazım olan kadrlara asanlıqla sahib olur. Siri səsli köməkçisinin inkişafı sahəsində isə əsas diqqət OpenAI və Anthropic şirkətlərinin həlləri ilə inteqrasiyaya yönəlib. Bununla yanaşı, Apple öz platformasından tamamilə imtina etmir, lakin bu yanaşma da əməkdaşların gözündə əlavə qeyri-müəyyənlik yaradır. Tarixi olaraq formalaşmış informasiya təhlükəsizliyi siyasəti həmçinin şirkət mütəxəssislərinə sürətli irəliləyiş əldə etməyə imkan vermir. Apple əsas diqqəti məlumatlarla istifadəçi cihazında işləməyə yönəldir, halbuki rəqiblər daha sürətli inkişaf edən və daha güclü hesablama imkanlarına malik bulud infrastrukturlarına üstünlük verirlər. Apple-ın özünə məxsus bulud əsaslı süni intellekt modeli isə istifadə olunan parametrlərin sayına görə rəqiblərin həllərindən dəfələrlə geri qalır.