Northwood Space kosmik şirkəti 375 milyon dollar investisiya alıb

    Kosmik infrastruktur şirkəti “Northwood Space” bazar ertəsi C seriyası investisiya mərhələsində 375 milyon dollar (təxminən 637,5 milyon manat) cəlb edib. İnvestisiya mərhələsinə “Andreessen Horowitz” və “DFJ Growth” birgə rəhbərlik edib. Razılaşmadan sonra şirkətin dəyəri 2 milyard dollara (3,4 milyard manat) çatıb.

    2022-ci ildə yaradılan “Northwood Space” peyklərlə Yer arasında daha sabit əlaqə qurmaq üçün antenalar, proqramlar və digər sistemlər hazırlayır. Bu sistemlər peyklərdən gələn məlumatları Yer üzündəki şəbəkələrə ötürür. Şirkətin həmtəsisçisi, keçmiş aktrisa Bridgit Mendler onun baş direktorudur.

    “Northwood Space” yanvar ayında B seriyası investisiya mərhələsində 100 milyon dollar (170 milyon manat) almışdı. Həmin mərhələyə də “Andreessen Horowitz” birgə rəhbərlik etmişdi. Eyni dövrdə şirkət ABŞ Kosmik Qüvvələri ilə təxminən 50 milyon dollarlıq (təxminən 85 milyon manat) müqavilə bağlamışdı.

    Müqavilənin məqsədi ABŞ-nin peykləri idarə edən şəbəkəsini yeniləməkdir. Yeni investisiya mərhələsinə “HSBC” ilə bağlanan maliyyə razılaşması da daxildir. “Northwood Space” bu vəsaiti işini genişləndirməyə, yeni əməkdaşlar götürməyə və müqavilələr üzrə öhdəliklərini yerinə yetirməyə xərcləyəcək.