OpenAI iddia edir: Keçmiş əməkdaş cihaz sirlərini Apple rəhbərliyinə verib

    “OpenAI” iddia edir ki, keçmiş əməkdaşı şirkətdən ayrılmazdan əvvəl hazırlanan cihazlarla bağlı 100-dən çox məxfi faylı şəxsi hesablarına göndərib. Məhkəmə sənədlərinə görə, həmin şəxs daha sonra “Apple” şirkətinə qayıdıb və məlumatları onun rəhbərliyinə çatdırıb.

    Fayllarda hələ göstərilməmiş ən azı 1 cihazın ətraflı təsvirinin olduğu deyilir. Sənədlərdə təchizatçılar, mühəndislik və istehsal göstəriciləri, həmçinin layihə faylları barədə məlumatlar olub. Cihazın xarici görünüşü, örtüyü və hissələrin necə kipləşdirilməsi ilə bağlı hesabatların da götürüldüyü iddia edilir.

    Sözügedən şəxs əvvəl “Apple”dan “OpenAI”a keçib, burada 6 ay işlədikdən sonra yenidən “Apple”a qayıdıb. “OpenAI”a görə, fayllar əməkdaşın son iş günü - 2 iyun 2026-cı ildə göndərilib. İddiaya əsasən, o, planları “Apple” rəhbərliyinə, o cümlədən şirkətin Asiyadakı əməliyyatlarına cavabdeh vitse-prezidentə göstərib.

    “OpenAI” bu hadisəni “Apple”ın həmin həftə göstərdiyi “HomeView” ağıllı ekranı və digər süni intellekt cihazları ilə əlaqələndirir. Şirkət təqdimatın aylar əvvəl keçirildiyini və məxfi məlumatların yeni məhsullara təsir edə biləcəyini düşünür. Bununla belə, “Apple”ın ağıllı ekran hazırladığı barədə xəbərlər illərdir yayılır. Belə məhsulların hazırlanması da adətən uzun vaxt aparır.

    Mübahisə “Apple” və “OpenAI” arasında kommersiya sirləri ilə bağlı davam edən məhkəmə işinin bir hissəsidir. “Apple” iyulda açdığı məhkəmə işində keçmiş əməkdaşlarının gizli sənədləri “OpenAI” üçün oğurladığını və cihaz prototiplərini izlədiyini iddia edib. Şirkət avqustda keçmiş mühəndisin noutbukunda aparılan ilkin araşdırma zamanı ciddi dəlillər tapıldığını açıqlayıb. “Apple” deyir ki, yeni işçilərin əvvəlki iş yerlərinə aid məxfi məlumatlardan yararlanmasını qadağan edən daxili qaydaları var.

    “OpenAI” məxfi məlumatların “Apple” daxilində yayılmasından və gələcək məhsulların hazırlanmasına təsir etməsindən narahatdır. Şirkət məsələni birbaşa “Apple” qarşısında qaldırdığını, lakin məlumatların saxlanılmadığına və işlədilmədiyinə dair istədiyi zəmanəti almadığını deyir. “Apple” isə apardığı araşdırmada bu iddiaları təsdiqləyən heç bir dəlil tapmadığını açıqlayıb.