Sam Altman süni intellekt sahəsini balon adlandırıb

     Hələ iqtisadçılar süni intellekt boom-unun fonunda fond bazarının mümkün “qızışmasından” danışarkən, OpenAI rəhbəri Sam Altman mətbuatla şam yeməyi zamanı kifayət qədər açıq şəkildə mövqeyini bildirib. “Hazırda biz elə bir mərhələdəyikmi ki, investorlar ümumilikdə süni intellekt haqqında həddindən artıq həvəsli davranırlar?” - deyə Altman soruşub və dərhal cavablayıb: “Mənim fikrimcə - bəli”. Jurnalistlərlə söhbət zamanı Altman bazarın süni intellektə reaksiyasını 90-cı illərdəki dotcom balonu ilə müqayisə edib. Həmin dövrdə internet startapların dəyəri kəskin artmış, 2000-ci ildə isə çökmüşdü.

     Altman belə hesab edir: “Balonlar yarananda ağıllı insanlar həddindən artıq coşquya qapılırlar. Tarixdəki əksər balonlara, məsələn, texnoloji balona baxsaq, onlar həqiqətən mövcud idilər. Texnologiyalar həqiqətən vacib idi. İnternet həqiqətən böyük bir hadisə idi. İnsanlar sadəcə həddindən artıq həyəcanlanmışdılar”. Altman əlavə edib ki, bəzi süni intellekt startaplarının - “üç nəfər və bir ideyadan” ibarət komandaların - inanılmaz həcmdə maliyyələşmə almasını “dəlilik” hesab edir. “Bu, qeyri-rasional davranışdır. Məncə, kiminsə burada uğursuzluğa düçar olması qaçılmazdır” - deyə Altman qeyd edib.

     Son bir ildə bir neçə süni intellekt startapı, o cümlədən OpenAI-ın həmtəsisçisi Ilya Sutskever tərəfindən idarə olunan Safe Superintelligence və OpenAI-ın keçmiş texniki direktoru Mira Murati tərəfindən təsis edilmiş Thinking Machines, milyardlarla dollar cəlb ediblər. Altman deyib: “Kimsə fenomenal məbləğdə pul itirəcək. Biz bilmirik kim, amma çox insan fenomenal məbləğdə pul qazanacaq. Mənim şəxsi inancım - səhv də ola bilərəm - budur ki, ümumilikdə bu, iqtisadiyyat üçün böyük xalis fayda olacaq”. Süni intellekt səbəbindən fond bazarında həddindən artıq qızışmanı qəbul etsə də, Altman OpenAI-ın parlaq gələcəyinə inanır: “Gözləmək olar ki, yaxın gələcəkdə OpenAI məlumat mərkəzlərinin tikintisinə trilyonlarla dollar sərf edəcək. Gözləmək olar ki, bir qrup iqtisadçı ümidsizliyə qapılacaq” - deyə Altman qeyd edib.